Балалар қауіпсіздігі – ортақ жауапкершілік
Балалардың өмірі мен денсаулығын қорғау, олардың қауіпсіз ортада өсуін қамтамасыз ету – ата-ана, мектеп және қоғамның ортақ міндеті. Осы бағытта елімізде «Балаларға назар аударыңыз!» республикалық акциясы өткізіліп, оның қорытындысы шығарылды. Іс-шара барысында түнгі уақытта ересектердің қарауынсыз жүрген 25 мыңнан астам кәмелетке толмаған бала анықталып, мектеп маңындағы жол қауіпсіздігіне қатысты бірқатар заңбұзушылық тіркелді.
Акция аясында полиция қызметкерлері балалардың қауіпсіздігіне байланысты тексеру жұмыстарын жүргізді. Негізгі назар кәмелетке толмағандардың түнгі уақытта көшеде қараусыз жүруіне, ата-аналардың жауапкершілігіне және білім беру ұйымдарының маңындағы жол инфрақұрылымының жай-күйіне аударылды.
ҚР Ішкі істер министрлігі ата-аналарға баланың тәрбиесі мен қауіпсіздігін қамтамасыз ету заңмен жүктелген міндет екенін еске салды. Кәмелетке толмағандардың түнгі уақытта заңда белгіленген шектеулерді сақтамай жүруіне жол берген жағдайда, ата-аналарға қатысты жауапкершілік қарастырылған. Сондықтан балалардың бос уақытын тиімді ұйымдастырып, олардың қайда жүргенін және кіммен араласатынын біліп отыру маңызды.
Акция барысында мектептердің айналасындағы жол қауіпсіздігі де назардан тыс қалған жоқ. Тексеру нәтижесінде үш мыңға жуық нұсқама беріліп, заң талаптарын бұзған 40-тан астам лауазымды тұлға жауапкершілікке тартылды. Мұндай шаралар білім беру ұйымдарының маңында қауіпсіз жағдай қалыптастыруға, жол қозғалысын ұйымдастырудағы кемшіліктерді анықтап, оларды жоюға бағытталған.
Бұл мәселе Қарағанды қаласы үшін де маңызды. Мектеп маңындағы жаяу жүргіншілер өткелдерінің қауіпсіздігі, жол белгілерінің талапқа сай болуы және көлік жүргізушілерінің жылдамдық режимін сақтауы оқушылардың жолдағы қауіпсіздігіне тікелей әсер етеді. Сонымен қатар балаларға жол қозғалысы ережелерін үйретіп, көшеде өзін дұрыс ұстау дағдыларын қалыптастыру қажет.
ҚР ІІМ Әкімшілік полиция комитеті басқармасының бастығы Асхат Дүйсембековтің айтуынша, баланың қауіпсіздігі мен психологиялық жағдайына ең алдымен ата-анасы жауап береді. Осыған байланысты полиция қызметкерлері ата-аналарды балаларының күнделікті өміріне назар аударып, мінез-құлқындағы өзгерістерді ескеруге шақырады. Балаға қатысты алаңдаушылық туындаған жағдайда, тиісті мамандардан көмек сұрап, қажет болса құқық қорғау органдарына хабарлау маңызды.
Балалардың қауіпсіздігін қамтамасыз ету тек бақылау мен жазалау шараларына ғана байланысты емес. Ол үшін отбасындағы тәрбие, мектептегі профилактикалық жұмыс және қоғамдық орындардағы қауіпсіздік талаптары өзара үйлесуі керек. Әрбір ересектің жауапкершілігі мен бейжай қарамауы балалардың өмірі мен денсаулығын қорғауға ықпал етеді.
Сондықтан балалардың қауіпсіздігіне қатысты талаптарды сақтау – баршаға ортақ міндет. Ата-ана, білім беру ұйымдары және құқық қорғау органдары бірлесе әрекет еткенде ғана жас ұрпақ үшін қауіпсіз орта қалыптастыруға болады.
Жұпар АМАНБАЙҚЫЗЫ,
«QH»