«Сарыарқа» Қазақстан кубогында көш бастады

14 тамызда Қарағандыда шайбалы хоккейден Қазақстан кубогы басталды. Биыл ел кубогы үшін екі топқа бөлінген 10 команда бақ сынауда. Турнир ойындары Қарағанды мен Өскемен қалаларындағы мұз айдындарында өтеді.

Кеншілер астанасындағы жарыстың алғашқы матчы жергілікті «Сарыарқа» мен павлодарлық «Иртыш» командалары арасында өтті. Қарағандылық хоккейшілер алғашқы кездесуде қарсыласын 4:2 есебімен жеңіп, турнирді сәтті бастады.

16 тамызда «Сарыарқа» екінші ойынын Рудныйдың «Горняк» командасына қарсы өткізді. Бұл кездесуде де қарағандылықтар жеңіске жетіп, қарсылас қақпасына алты шайба соқты. Қорытынды есеп – 6:3.

Матчтың алғашқы екі кезеңінде «Сарыарқа» ойыншылары қарсыласқа жауап беруге мүмкіндік бермей, төрт шайба соқты. Үшінші кезеңде рудныйлықтар есеп айырмасын қысқартуға тырысып, бірнеше нәтижелі шабуыл ұйымдастырды. Алайда «Сарыарқа» хоккейшілері қарқынын бәсеңдетпей, тағы екі гол соғып, басымдығын сақтап қалды. «Горняк» соңына дейін күрескенімен, кездесудің нәтижесін өзгерте алмады.

Осылайша, «Сарыарқа» Қазақстан кубогындағы екінші жеңісіне қол жеткізіп, төрт ұпаймен А тобында көш бастады. Қарағандылық команда турнирді жақсы қарқынмен бастап, өз алаңындағы ойындарда жанкүйерлерін қуантты. Енді «бүркіттердің» алдында топтағы келесі кездесулерде осы қарқынды сақтап, кубок жолындағы күресті жалғастыру міндеті тұр.