Қарағанды мен Жезқазған арасындағы жол кеңейеді
Қарағанды мен Жезқазған қалаларын жалғайтын республикалық маңызы бар автожолды кеңейту жұмыстары басталды. Жоба аясында қосымша екі жолақ салынып, бағытты бірінші техникалық санаттағы төрт жолақты жолға айналдыру көзделіп отыр. Бұл көлік қозғалысын жеңілдетіп, Орталық Қазақстандағы елді мекендер арасындағы байланысты жақсартуға мүмкіндік береді.
Бұл туралы «ҚазАвтоЖол» ҰК» АҚ басқарма төрағасы Дархан Иманашев Орталық коммуникациялар қызметінде өткен брифингте мәлімдеді.
Оның айтуынша, автожолдарды жоғары техникалық санатқа көшіру кезінде көлік ағынының қарқындылығы ескеріледі. Бірінші санаттағы жолдарға қойылатын негізгі талаптардың бірі – тәулігіне орта есеппен 7-8 мыңнан астам көліктің жүруі.
Айта кетейік, Қарағанды–Жезқазған автожолы өткен ғасырдың 60-жылдары салынған. Бұған дейін екі жолақты болған бағытта биыл қосымша екі жолақтың құрылысы қолға алынды. Нәтижесінде жол төрт жолақты қозғалысқа бейімделіп, бірінші техникалық санат талаптарына сәйкестендірілмек.
– Қарағанды–Жезқазған бағытында биыл қосымша екі жолақтың құрылысы басталды. Нәтижесінде бұл жолды бірінші санаттағы төрт жолақты автожолға айналдыру көзделіп отыр, – деді Дархан Иманашев.
Сонымен қатар елдегі өзге де маңызды көлік бағыттарын жаңғырту жоспарланған. Атап айтқанда, ұзындығы 1 100 шақырым болатын «Ақтөбе–Қызылорда» автожолын төрт жолақты қозғалысқа көшіру көзделіп отыр. Көлік ағынының артуына байланысты «Талдықорған–Өскемен» бағытын да бірінші техникалық санатқа ауыстыру қажеттілігі қарастырылуда.
Бұдан бөлек, «ҚазАвтоЖол» халықаралық маңызы бар автожолдардың өткізу қабілетін арттыру бойынша жаңа ұсыныс әзірлеп жатыр. Компания заңнамаға кемінде үш жолақты қозғалыс ұғымын енгізуді ұсынып отыр. Бұл тәсіл бойынша қосымша жолақтар әрбір 5-10 шақырым сайын орналастырылуы мүмкін. Мұндай шешім көлік қозғалысы тығыз учаскелерде басып озуды жеңілдетіп, жол қауіпсіздігін арттыруға бағытталған.
Айта кетейік, 2026 жылдың қаңтар-қазан айларындағы ақылы автожолдардың жүктемесі жөніндегі рейтингке еліміздегі 28 учаске енген. Он айдың қорытындысы бойынша ең жоғары көрсеткіш «Алматы–Қонаев» бағытына тиесілі болды. Аталған жолмен осы кезеңде 10,8 миллионнан астам көлік жүрген.
Жалпы, Қарағанды–Жезқазған автожолын кеңейту – Орталық Қазақстанның көлік инфрақұрылымын дамытудағы маңызды жобалардың бірі. Жаңғырту жұмыстары аяқталған соң өңірлер арасындағы қатынас жақсарып, жолаушылар мен жүк тасымалы үшін қолайлы жағдай қалыптаспақ.
Жанайым ЖАЛҒАС,
«QH»