Жаңа оқу жылына дайындық басталды
Жаңа оқу жылының басталуына бір ай уақыт қалды. Осыған байланысты ҚР Оқу-ағарту министрлігі 2026–2027 оқу жылының күнтізбесін бекітіп, әлеуметтік осал санаттағы отбасылардың балаларын қолдауға бағытталған дәстүрлі «Мектепке жол» республикалық акциясын бастады. Биыл бұл мақсатқа жергілікті бюджеттерден 23 миллиард теңгеге жуық қаржы бөлініп, 450 мыңға жуық оқушыға материалдық көмек көрсетіледі.
Министрлік бекіткен оқу кестесіне сәйкес, сабақ 1 қыркүйекте басталып, 25 мамырда аяқталады. Күзгі демалыс 26 қазан мен 1 қараша аралығында, қысқы демалыс 28 желтоқсаннан 10 қаңтарға дейін жалғасады. Бірінші сынып оқушыларына арналған қосымша демалыстың мерзімі кейінірек нақтыланады. Ведомствоның мәліметінше, оқу және демалыс кезеңдері балалардың жас ерекшелігі мен санитарлық талаптарды ескере отырып белгіленген.
– Жаңа оқу жылы 1 қыркүйекте басталып, 25 мамырда аяқталады. Оқу процесі оқушылардың сапалы білім алуына және тиімді демалысына мүмкіндік беретін бекітілген күнтізбеге сәйкес ұйымдастырылады, – деді ҚР Оқу-ағарту министрлігі Орта білім комитеті төрағасының орынбасары Зейнеп Махсұтова.
1 тамыздан басталатын «Мектепке жол» республикалық акциясы аясында әлеуметтік осал санаттағы отбасылардың балаларына мектеп формасын, аяқ киімін және оқу құралдарын сатып алуға қаржылай қолдау көрсетіледі. Биыл көмек көлемі ұлғайтылып, қаражат тікелей ата-аналардың есепшотына аударылады. Бұл қаражатты отбасы баланың нақты қажеттілігіне қарай пайдалана алады.
– Биыл әлеуметтік қолдау көлемі артты. Қаражат ата-аналардың есепшотына аударылады, бұл оларға баласына қажетті мектеп формасын, аяқ киімді немесе басқа да керек-жарақты өз қалауынша сатып алуға мүмкіндік береді. Мемлекеттік қолдаудың басты мақсаты – әр баланың жаңа оқу жылын толық дайындықпен бастауына жағдай жасау, – деді ҚР Оқу-ағарту министрлігі Орта білім комитеті төрағасының орынбасары Толқын Исакова.
Министрлік өкілдерінің айтуынша, акция қыркүйек айының соңына дейін жалғасады. Көмекке мұқтаж отбасылар тұрғылықты жеріндегі мектептерге немесе жергілікті әкімдіктерге жүгіне алады.
Осылайша, жаңа оқу жылы қарсаңында мемлекет бір жағынан оқу процесінің нақты кестесін бекітсе, екінші жағынан әлеуметтік тұрғыдан аз қамтылған отбасылардың балаларының білім алуына қолайлы жағдай жасауға бағытталған қолдау шараларын жалғастырып отыр.
Құралай КӨБЕНОВА,
«QH»