Сарандағы мектеп спорт залына құтқарушы Хали Хайраттың есімі берілді

Саран қаласындағы Абай атындағы жалпы білім беретін мектептің спорт залына азаматтық қорғау сержанты Хали Хайраттың есімі берілді. Ол осы мектептің түлегі болған.

– Бұл спорт залы біздің ержүрек жауынгеріміз Хали Хайраттың құрметіне аталды. Ол өз өмірін тәуекелге тігіп, туған жерін табиғи апаттан қорғады, – деді Қарағанды облысы ТЖД бастығының бірінші орынбасары Еркін Отарғалымұлы. – Хайрат батыл, қайсар, спортты жанына серік еткен азамат еді. Бұл зал құтқарушы мамандығына деген құрметтің белгісі әрі батырдың есімін мәңгі есте қалдырудың бір жолы. Оның өзі білім алған мектепте мемориалдың орналасуы біз үшін ерекше маңызды.

Хали Хайратты еске алу мақсатында мектепте оның өмір жолын баяндаған төрт стенд орнатылды.

Айта кетейік, Хали Хайрат 2024 жылдың 6 қазанында Қарқаралы ауданындағы орман өрті кезінде қаза тапты. Оның ерлігі ескеріліп, қайтыс болғаннан кейін «Ерлігі үшін» медалімен марапатталды.

Құтқарушылар мектепке спорттық жабдықтар – доптар, шахмат, теннис құралдарын сыйға тартты. Ал салтанатты шарадан кейін қазақ күресі мен үстел теннисінен жарыстар өтті.

Құралай КӨБЕНОВА,

«QH»