Оқушылар облыстық бейнерепортаж байқауына қатыса алады
Абай атындағы Қарағанды облыстық балалар кітапханасы 8-10 сынып оқушыларын «Қарағандының өшпес есімдері» облыстық байқауына қатысуға шақырады. Байқауға қаланың дамуына елеулі үлес қосқан немесе қосып жатқан Қарағанды тұрғындары туралы қазақ және орыс тілдерінде бейнерепортаждар қабылданады.
Байқау Қарағандының 90 жылдығына орай ұйымдастырылуда.
Өтінімдерді 1 қарашаға дейін, adb_abai@mail.ru электрондық поштасына жіберу қажет. Конкурстық жұмыстар да 15 қарашаға дейін осы пошта арқылы қабылданады.
Әр қатысушы бір шығармашылық жұмыс дайындауы тиіс. Ұжымдық бейнерепортаждар қабылданбайды. Шығармашылық жұмыс – бұл 2 минутқа дейінгі бейнерепортаж, 300 Мб-тан аспайды, mp3 форматында, жақсы дыбыспен, кескіннің жоғары сапасын қамтамасыз ету үшін 1930×1080 пиксель өлшемін пайдалану ұсынылады. Бейнероликтің мазмұны конкурстың тақырыбына сәйкес болуы керек.
Жұмысты құзыретті қазылар алқасы бағалайды. Нәтижелер марапаттау рәсімінде жарияланады, сондай-ақ www.odb-abai.kz кітапхана сайтында орналастырылады.
Жұмысты бағалау кезінде келесі критерийлер ескеріледі:
— бейнероликтің регламентке сәйкестігі;
— бейнерепортаждың мазмұны (сюжеттің толықтығы мен мазмұндылығы, сауаттылық);
— шығармашылық тәсіл (идеяның өзіндік ерекшелігі, композициялық шешім, бірыңғай стильді сақтау).
Ұйымдастырушы 15 қарашада дауыс беру үшін #Қарағандыныңөшпесесімдері хэштегімен YouTube-арнасында жұмыстарды орналастырады. 20 қарашада сағат 12:00-де дауыс беру тоқтатылады. Ең көп қаралған ролик «Көрермендер көзайымы сыйлығы» аталымының жеңімпазы атанады.
Байқау жеңімпаздарын марапаттау 22 қарашада өтеді (уақыт қатысушыларға қосымша хабарланады). Жеңімпаздар дипломдармен және бағалы сыйлықтармен марапатталады.
Толық ақпараттарды мына нөмірлер арқылы білуге болады: 8-701-66-74-998, (8-7212) 41-23-26.
Құралай КӨБЕНОВА, «QH»