«Индиго» қосымшасына енгізілген өзгерістер

Мектепке дейінгі ұйымдарды қаржыландыру моделінің өзгеруіне байланысты «Индиго» қосымшасына бірқатар маңызды түзету енгізілді. Бұл жаңашылдық ата-аналарға балабақшаға тіркеу және кезекті бақылау үдерісін айтарлықтай жеңілдетуге бағытталған.

«Индиго» жүйесі – балаларды балабақша кезегіне тіркеу және олардың орын ауысуын бақылау үшін жасалған электрондық платформа. Қосымшада барлық қажетті ақпарат, бейне және мәтіндік нұсқаулықтар қамтылған. Сонымен қатар, жүйе кезекте тұрған барлық балалардың тізімін көрсетіп, ата-аналарға баласының орнын нақты уақыт режимінде бақылауға мүмкіндік береді.

Жаңа өзгерістер қандай артықшылықтар береді?

Жаңартылған «Индиго» қосымшасы арқылы ата-аналар енді:

Баласын кезекке қойып, оның жылжуын күн сайын бақылай алады;

Кезек келген кезде жедел хабарлама алады;

Балабақша таңдау мен жауап беру үдерісін оңай басқарады.

Ата-аналар үшін маңызды ережелердің бірі – баланың кезегі келгенде хабарлама алғаннан кейін белгілі бір уақыт ішінде жауап беру міндеттілігі. Жауап беру үшін 2 күн, ал балабақшаны таңдау үшін 5 күн беріледі. Егер ата-ана осы уақыт аралығында ешқандай әрекет жасамаса, бала 28 күнге стоп-листке енгізіледі. Осы мерзім аяқталған соң ғана қайтадан өтініш беру мүмкіндігі қарастырылады.

Барлық жаңалықтан хабардар болып, өзгерістерді уақытылы бақылау үшін ата-аналарға ED24.kz қосымшасын жүктеу ұсынылады. Бұл платформа арқылы:

Баланың кезектегі орнын тексеруге;

Жедел хабарламалар алуға;

Қажетті мәліметтерді жылдам енгізуге мүмкіндік беріледі.

Жаңартылған «Индиго» қосымшасы мектепке дейінгі білім беру жүйесіндегі ашықтық пен ата-аналарға қолайлылықты арттыруға бағытталған. Енді ата-аналар балаларының балабақшаға орналасу үдерісін өз бетінше оңай қадағалай алады. Бұл өзгерістер мектепке дейінгі білім беру қызметтерінің сапасын жақсартып, олардың қолжетімділігін арттыруға көмектеседі.

Құралай КӨБЕНОВА,

«QH»

Фото ашық дереккөзден