Бүкірліктен құтқаратын құрылғы жасады

Қарағандыда Назарбаев Зияткерлік мектебінің оқушылары Малика Мейрамова, Дильназ Тапина және Индира Дулатова бүкірлікпен күресу үшін PosTrue құрылғысы мен мобильді қосымша әзірледі. Қыздардың жобасы Skills Up хакатонының аймақтық кезеңінде жеңіске жетті.

Жетекшілері – математика пәнінің мұғалімдері Сәулебек Мақашев пен Есентай Өнер.

– Біз оқушылар арасында сауалнама жүргіздік, көбісі бүкірейетінін атап өтті. Бұл омыртқааралық жарыққа, тыныс алу жолдарының деформациясына, ыңғайсызданудың пайда болуына, шаршау мен ауырсынуға әкеледі. Біздің жоба бүкірею және оның салдары (бұлшық еттердің дамымауы және позаның өзгеруі) сияқты мәселелерді шешеді. Мақсатты аудитория – бұлшық еттері қатаймаған 1-2 дәрежелі бүкіреюі бар 12-55 жас аралығындағы адамдар, – дейді жоба авторлары. – PosTrue құрылғысы MPU6050 гироскоп сенсорларынан, Arduino Uno және Bluetooth модулінен тұрады. Датчиктер омыртқа иілімдеріне орналастырылады. Құрылғыны пайдалану омыртқа қалпын біртіндеп жақсартуға көмектеседі. Оны дәрігерлер де, пациенттер де қолдана алады.

Әзірлеушілер айтқандай, пайдаланушы құрылғыны 10 минут киіп отырады және осы уақыт ішінде ол туралы деректер сақталады. Деректер жөнінде қосымшада график құрылады, яғни иілу бұрышының нормасы анықталады және осыған орай бүкірею дәрежесі бақыланады. Қосымша арқылы дәрігер өз пациентін бақылай алады. Сондай-ақ қолданбада күнтізбе бар, онда пайдаланушы қолданбада бар жаттығуларды жасағанын белгілейді. Сонымен қатар клиникалардың, массаж терапевтерінің, бассейндердің, спортзалдардың орналасқан жері және олар туралы ақпарат (телефон нөмірі, шолулар, әлеуметтік желілер және т.б.) көрсетілген карта бар.

PosTrue – арқаңызды тегіс ұстайтын корсет емес. PosTrue – прогресті адамның өзі көре алатындай етіп позаны біртіндеп жақсарту үшін жасалған құрылғы.

PosTrue мобильді қосымшасы үш тілде қолжетімді. Жақында мектеп оқушылары оны бета нұсқасында іске қосқысы келеді. Содан кейін олар Instagram арқылы жарнамалауды жоспарлап отыр.

– Жақында біз жобамызды хакатонда таныстырып, финалға шықтық. Аймақтық іріктеу турына барлығы 20 команда қатысты, олардың барлығы дерлік колледждер мен университеттерден болды, – дейді Дильназ Тапина. – Енді жобамызды Алматыда қорғаймыз. Болашақта құрылғымыздың жаппай өндірісін жолға қойып, оны тек Қазақстанда ғана емес, бүкіл ТМД-да таратқымыз келеді.

Skills Up жастар хакатоны Қазақстандағы БҰҰ Даму бағдарламасының Ұлттық білім апталығы аясында ұйымдастырылды. Аймақтық іріктеу турлары елдің төрт қаласында өтеді. Финалға үздік стартаптар өтеді, әр аймақтан үш команда қатысады. Хакатонның соңғы кезеңі Алматыда өтеді.