Армияға айти саласының сарбаздары қажет
Әскерге шақырылатын айтишниктер әскерде бір жыл қызмет етудің орнына 42 күн ішінде әскери-техникалық мектепте балама қызмет өткере алады. Мұндай жобаны Қорғаныс министрлігі енгізуде. Программист-курсанттарды Қарағанды әскери-техникалық мектебі қабылдай ала ма, жоқ па? Бұл туралы министрдің орынбасары қаламызға жасаған сапары барысында айтып берді.
Бұл – Қорғаныс министрінің цифрландыру және киберқауіпсіздік жөніндегі орынбасары Дархан Ахмедиевтің идеясы. Ол өзі – Қарағанды техникалық университетінің түлегі, бүгінде соғыстар форматын өзгерткенін және армияға қарапайым сарбаздардан басқа айти сферасының сарбаздары қажет екенін түсінеді.
– Қорғаныс министрлігінде талдау жүргізілді. Белгілі болғандай, мұндай әскерге шақырылатындар көп емес. Егер олар бір жылға әскерге жіберілмесе, армия көп шығынға ұшырамайды. Бірақ оларды 42 күнде әскери қызмет негіздеріне үйретуге болады. Сондықтан пилоттық жобаны іске қосуды ұйғарды. Айтишниктерге әскери-техникалық мектептер базасында үш мамандық аясында (ақпараттық жүйелер мен технологиялар, киберқауіпсіздік және дрон операторы) баламалы қызмет өткеруге мүмкіндік беру қажет. Осы ғылымдардың барлығы айти мамандарына соншалықты таныс екенін ескере отырып, олар қысқа мерзімде дағдыларды игере алады деп сенемін, – дейді Қазақстан Республикасы Қорғаныс министрінің орынбасары Дархан Ахмедиев.
– Мен жас болсам, бұл мүмкіндікке қуанар едім және оны міндетті түрде қолданар едім. Сондықтан бұл – суперидея, суперұсыныс. Өйткені әлі армияда болмаған жастар ІТ мамандығын алып шығады. Әскери-техникалық мектепке хабарласыңыз, қыркүйек айында олар курстар ашуға уәде беріп отыр, – деді IT-компанияның басшысы Александр Соколов.
Министрдің орынбасары мектептегі жағдайларды тексерді және бұл жағдайларда оптимизм аз. Ғимаратқа күрделі жөндеу жұмыстарын жүргізіп, полигонды жаңғырту қажет, қосымша оқу-материалдық база керек. Жалпы алғанда, Қорғаныс министрлігінің есептеуінше, жобаны іске асыруға 700 миллион теңге қаражат қажет. Қазір олар оқу бағдарламаларын жазатын әзірлеушілер мен оқытушылар іздеуде.
– Шынымды айтсам, айтишниктер әскерге барудан қорқады. Содан кейін өз ортасына бейімделу үшін олар не істей алатынын зерттейді. Сонымен қатар олар атағын алады, бұл болашақта оларды әскери саламен байланысты кейбір кәсіпорынға жұмысқа орналастыруға ықпал етеді. Жастарға қызықты болады деп ойлаймын, – дейді Қарағанды техникалық университетінің ақпараттық есептеу жүйелері кафедрасының меңгерушісі Алексей Калинин.
Пилоттық жобаны 1 қыркүйектен бастап Кеңес Одағының Батыры Мартбек Мамыраев атындағы әскери-техникалық мектептің Қарағанды филиалында бастау жөнінде шешім қабылданды. Қазір курсант үшін баламалы қызмет курсының құны 370 мың теңге.
Құралай КӨБЕНОВА,«QH»