Қарағандылықтар қазақ күресінен республикалық турнирде жеті медаль жеңіп алды
Қарағандылық палуандар Қызылордада Қажымұқан Мұңайтпасұлын еске алуға арналған 16-шы Республикалық қазақ күресі турнирінде екі алтын және бес қола медаль жеңіп алды. Биыл жарысқа Қазақстанның 12 өңірінен 200-ге жуық палуан қатысты.
Ірі спорттық шарада қарағандылықтар лайықты нәтижелер көрсетті. Арнур Көмекпай 60 келі салмақ санатында алтын медаль алды.
Дидар Беркенов 90 келі салмақта чемпион атанды.
– Бұл біздің спортшылар үшін 2025 жылдың алғашқы старты. Мен көрсетілген нәтижені тамаша деп санаймын. Өткен жылғы турнирмен салыстырғанда ілгерілеушілік бар. Сол кезде біз тек екі күміс медаль жеңіп алдық, – деді қазақ күресінен Қарағанды облысы бойынша аға жаттықтырушы Бекзат Ахметбеков.
Біздің бес палуанымыз – Раханбек Сидога, Шыңғыс Төлеуов, Адай Мүбарак, Нұрбек Қолдасов және Ерасыл Қуаныш қола медальға ие болды.
Қазір қарағандылық палуандар сәуір айында өтетін Қазақстан чемпионатына дайындалуда.
Қарағанды облысының дене шынықтыру және спорт басқармасының ақпараты негізінде