Еңбекке құрмет – елге құрмет

Қаланың көркеюі мен дамуының артында маңдай термен еңбек етіп жүрген мыңдаған маманның еңбегі бар. Күн сайын бой көтеріп жатқан тұрғын үйлер, әлеуметтік нысандар, жаңарған ғимараттар мен инфрақұрылымдық жобалар – құрылыс саласы мамандарының тынымсыз еңбегінің нәтижесі. Осыны ескере отырып, Қарағандыда Құрылысшылар күніне орай еңбек адамдарына құрмет көрсетіліп, мерекелік мәдени шаралар ұйымдастырылды.

Тамыз айының екінші жексенбісінде аталып өтетін Құрылысшылар күні – елдің әлеуметтік-экономикалық дамуына үлес қосып жүрген сала мамандарына алғыс білдіретін маңызды күн. Құрылысшы еңбегі тек ғимарат тұрғызумен шектелмейді. Әрбір нысанның артында үлкен жауапкершілік, кәсіби шеберлік, төзім мен адал еңбек тұр.

Қарағанды қаласында өткен мерекелік шаралардың негізгі мақсаты – еңбек адамдарының еңбегін дәріптеп, олардың қоғамдағы орнын айшықтау. Осы орайда Теміржолшылар мәдениет сарайында құрылыс саласының мамандарына арналған салтанатты концерт ұйымдастырылды.

Мерекелік кеш барысында жергілікті өнерпаздар ән айтып, хореографиялық қойылымдар ұсынды. Сахнадан еңбек, туған жер, отбасы және сүйікті мамандық туралы шығармалар орындалып, құрылысшыларға жылы лебіздер айтылды. Кәсіби мереке еңбек адамдарының еңбегін бағалап, оларға құрмет көрсетудің жақсы үлгісіне айналды.

«Бұл кештің басты ерекшелігі – құрылыс саласында еңбек етіп жүрген мамандарға ерекше көңіл бөліп, олардың еңбегін мәдени шара арқылы дәріптеу. Құрылысшылар – қаланың дамуына тікелей үлес қосып жүрген жандар. Сондықтан олардың кәсіби мерекесін жақсы көңіл-күймен, әнмен және өнермен атап өтуді жөн көрдік. Бағдарламада еңбек, үй, туған жер және мамандыққа деген адалдық тақырыптарына арналған шығармалар орындалды», – деді Теміржолшылар мәдениет сарайының әдіскері Айнұр Әділова.

Құрылысшылардың еңбегі – қаланың бүгінін қалыптастырып қана қоймай, оның болашағына негіз қалайтын маңызды еңбек. Бір үйдің қабырғасы қаланғаннан бастап, тұтас бір шағынауданның бой көтеруіне дейін құрылыс саласының әр маманы өз үлесін қосады. Сондықтан кәсіби мереке – сала мамандарына алғыс айтып, олардың еңбегін қоғам алдында дәріптеуге мүмкіндік беретін ерекше күн.

Мерекелік шара қаладағы басқа мәдени алаңдарды да қамтыды. Құрылысшылар күніне орай Қарағандыдағы гипермаркеттердің бірінде тұрғындарға ерекше концерттік бағдарлама ұсынылды. Әдетте құрылыс материалдары мен құрал-саймандар сатылатын орын бірнеше сағатқа мәдени алаңға айналды.

Келушілер алдында халықаралық байқаулардың лауреаттары, ағайынды Рафаэль және Джалиль Гизатулиндер өнер көрсетті. Өнерпаздар итальян, татар, қазақ және орыс тілдеріндегі әндер мен романстарды орындап, көрерменге классикалық вокалдың әсемдігін паш етті.

Өнер иелері Қазақстан мен Ресейдің жетекші театрларында еңбек етіп, шетел сахналарында да өнер көрсеткен. Олардың жанды дауыстағы орындауы көпшіліктің көңілінен шығып, мерекелік кештің мазмұнын толықтыра түсті.

Концерт соңында өнерпаздар көрермендермен жүздесіп, құрылыс саласының мамандарын кәсіби мерекесімен құттықтады. Ал мерекелік бағдарламаның жалғасында би марафоны ұйымдастырылып, тұрғындар да кештің белсенді қатысушысына айналды.

«Мұндай кездесулердің маңызы зор. Себебі бұл – еңбек адамдарына деген құрметті көрсетудің бір жолы. Әр мамандықтың қоғам үшін маңызы бар. Біз алдағы уақытта да түрлі кәсіп иелеріне арналған мәдени бағдарламаларды жалғастырып, тұрғындарға жақсы көңіл-күй сыйлауға тырысамыз», – деді Айнұр Әділова.

Айта кетейік, Теміржолшылар мәдениет сарайында әр жексенбі сайын түрлі мамандық иелеріне арналған мәдени іс-шаралар өткізіліп тұрады. Бұл – еңбек адамдарының кәсіби мерекесін атап қана қоймай, олардың еңбегін көпшілікке танытып, қоғамдағы еңбек мәдениетін қалыптастыруға бағытталған маңызды бастама.

Қарағанды – еңбегімен өркендеген қала. Оның дамуына құрылысшылармен қатар түрлі салада қызмет етіп жүрген мыңдаған еңбек адамы үлес қосып келеді. Әрқайсысының атқаратын жұмысы қаланың тыныс-тіршілігі үшін маңызды.

Адал еңбек – қоғам дамуының берік негізі. Ал еңбек адамына құрмет көрсету – жас ұрпаққа еңбектің қадірін түсіндіретін, жауапкершілік пен кәсібилікті бағалауға үндейтін маңызды құндылық.

Құрылысшылар күніне орай ұйымдастырылған бұл шаралар да осы мақсатты көздеді. Қарағанды қаласының құрылысшыларына құрмет көрсетіліп, олардың қала дамуына қосқан еңбегі ерекше аталып өтті. Еңбек адамының маңдай терін бағалау – елдің ертеңіне деген құрметтің бір көрінісі.

Қарағандыны көркейтіп, жаңа нысандардың бой көтеруіне үлес қосып жүрген құрылысшылардың еңбегі – қала тарихының ажырамас бөлігі. Олардың кәсіби шеберлігі мен адал еңбегі лайықты құрметке ие.

Қанағат ЖИЕНҚҰЛОВА,

«QH»