Жастар үшін мүмкіндіктер
Қарағанды жоғары оқу орындарында білікті кадр дайындауға өндіріс саласының мамандары көмектеседі. Бұл жолы олар Сағынов атындағы техникалық университетпен бірігіп, бас жүлдеге білім грантын қойып, олимпиада ұйымдастырды. Құю және машина жасау зауытында өткен бірінші республикалық байқаудың ақтық кезеңі өтті.
Балқаш политехникалық колледжінің студенті Алина Тоқболатова болашақ автомобиль бөлігінің параметрлерін орнату үшін сандық бағдарламалық жасақтамасы бар фрезерді пайдаланады. Бұл олимпиада тапсырмаларының бірі, оған Қазақстанның түкпір-түкпірінен 12 үздік ұл-қыз Қарағандыға жиналып, 200-ге жуық қатысушының арасында бірнеше пән бойынша онлайн-квалификациялық тестілеуден өтті. Болашақ инженер-механиктерге практикалық білімнен басқа, химия, физика, өнеркәсіптік қауіпсіздік және басқа да бірқатар пән бойынша білімімен сұрақ-жауап сайысында зияткерлік шабуылдауға тура келді. Білімді жастардың біліктігін олимпиаданы ұйымдастырған техникалық университет пен құю және машина жасау зауытының өкілдерінен тұратын қазылар алқасы бағалады.
– Олимпиаданың мақсаты – машина жасау мамандықтарын танымал ету, сонымен қатар жастарды тарту. Өйткені, соңғы кездері бұл мамандықтар артта қалып бара жатыр. Машина жасау өте маңызды. Ел Президенті 2025 жылды «Жұмысшы мамандықтары жылы» деп жариялады, – дейді Қарағанды құю және машина жасау зауытының коммерциялық директоры Светлана Алексеева.
Қазақстан машина жасаушылар одағының бастамасымен Білім, индустрия және құрылыс министрлігімен бірлесіп, қарқынды дамып келе жатқан машина жасау саласы үшін мамандарды даярлаудың Жол картасы әзірленді.
– Жол картасы – бүгінде елімізде тапшы болып отырған машина жасау саласына қажетті – инженер, дәнекерлеуші, механик – білікті мамандарды дайындауға мүмкіндік береді. Жұмысшы мамандықтарының беделін арттыру, конкурстарды жиі өткізу, гранттарды көбірек беру бүгінгі күннің басты талабы, – дейді «Қазақстан машина жасаушылар одағы» атқарушы дирекциясы директорының орынбасары Индира Кауметова.
Бірінші орын және университетте машина жасау мамандығы бойынша тегін оқу гранты Балқаш политехникалық колледжінің 4 курс студентіне бұйырды. Екінші орын мен жыл сайынғы шәкіртақы Қарағанды техникалық университетінің студентіне бұйырса, үшінші орын Орал қаласындағы Назарбаев Зияткерлік Мектебінің 11 сынып оқушысына бұйырды. Оған MacBook сыйлығы табысталды.
Жұпар АМАНБАЙҚЫЗЫ, «QH»