Жылу желілерін іске қосу кезең-кезеңімен жүреді

Қарағандыда жылыту маусымына дайындық жұмыстарының кезекті кезеңі басталды. 10 қыркүйектен бастап «Теплотранзит Қарағанды» мекемесі магистралды жылу желілерін циркуляциялық режимге шығарып, жүйеге кезең-кезеңімен су толтыруға кірісті.

Жұмыс бірнеше кезең бойынша жүргізіледі. Алдымен жылу Пришахтинск пен Сұрыптау шағынаудандарына беріледі. Одан кейін Оңтүстік-Шығыстағы мөлтек аудандар қамтылып, жылу желісі Майқұдыққа жетеді. Соңғы кезекте Михайловкаға жылу беріледі.

Коммуналдық қызмет мамандары бұл мерзімдердің жылу көздерінің және магистралды желілердің дайындығына, сондай-ақ жұмыстар барысында анықталуы мүмкін ақауларға байланысты өзгеруі ықтимал екенін ескертеді.

Жылыту маусымы ресми басталғаннан кейін тұтынушыларға жылу беру алдын ала берілген өтінімдерге сәйкес жүзеге асырылады. Осыған байланысты көпқабатты үйлер мен әлеуметтік нысандардың ішкі жылу жүйелерінің дайындығы маңызды.

Апаттық жағдайлардың алдын алу және пәтерлер мен ғимараттарды су басудан қорғау үшін жауапты тұлғалар, ПИК, МИБ және басқа да тұтынушылар жылу желілерін, жылу тораптары мен жылыту құрылғыларын су қабылдауға толық дайындауы қажет.

«Теплотранзит Қарағанды» мекемесі жылу энергиясы берешегі жоқ және 100 пайыздық дайындық актісін алған тұтынушыларға ғана берілетінін еске салады.

Сондықтан жылыту маусымы қарсаңында тұрғындарға ішкі жылу жүйелерінің жағдайын тексеріп, қажетті жұмыстарды уақытында аяқтау маңызды. Бұл қыс мезгілінде жылудың тұрақты берілуін қамтамасыз етіп қана қоймай, желідегі апаттардың алдын алуға мүмкіндік береді.