Жеткіншіктер «Жас сарбаз» атанды
ҚР тәуелсіздігінің 30 жылдық мерейтойына орай Қарағанды қаласына қарасты Ю.Н.Павлов атындағы мектептің 37 оқушысы «Жас сарбаз» ұйымының қатарына қабылданып, ресми құжатқа қол жеткізді.
«Жас сарбаз» сыныптарына жаңадан қабылданған оқушылар оқуда үздік, антына адал, жауапты және тәртіпті болуға, ең бастысы, «Жас сарбаз» атағын және сүйікті мектебінің абыройын қадірлеуге салтанатты түрде ант берді. Осы айтулы күні салтанатты шараға Қарағанды гарнизоны «Астана» өңірлік қолбасшылығының атынан шақырылған қонақтар мен ата-аналар қауымы, әскери қызметкерлер «Жас сарбаздарды» айтулы күндерімен құттықтады.
– Құрметті Ю.Н.Павлов атындағы мектептің жас патриоттары, сіздер Тәуелсіздік күні қарсаңында «Жас сарбаз» ұйымының қатарына қосылып отырсыздар. Елбасы Отанға деген сүйіспеншілікті арттыру, жастарды патриотизмге тәрбиелеу үшін «Жас сарбаз» ұйымын құруды тапсырды. Осы қысқа уақыт ішінде көптеген оқушылар «Жас сарбаз» қатарынан табылды. Сондай ақ олар үлкен жетістіктерге қол жеткізді. Тұңғыш Президентіміздің қолдауы мен тапсырмасы аясында «Жас сарбаз» ұйымының мүшелері қайырымдылық акцияларына белсенді түрде қатысып, өзге оқушыларға үлгі көрсетіп келеді, – деп атап өтті өз сөзінде оқушылар мен ата-аналарды және мектеп ұжымын құттықтай келген «Астана» өңірлік қолбасшылығы қолбасшысының орынбасары, полковник Мұрат Агубаев.
Естеріңізге сала кетейік, ҚР Қарулы Күштері «Астана» өңірлік қолбасшылығының «Жас Ұлан» әскери-патриоттық клубы Ю.Н.Павлов атындағы жалпы білім беретін орта мектепте «Жас сарбаз» сыныптарының базасында орналасқан. Аталмыш мектептің мұғалімдері жас патриоттарды жасөспірім шақтан бастап Отанға сүйіспеншілікке, туған елге, халқына адал қызмет атқаруға, қоршаған ортаны қорғауға баулып келетіндігін жеткізді. Қарағанды гарнизоны, «Астана» өңірлік қолбасшылығының әскери қызметкерлері «Жас Ұлан» әскери-патриоттық клубымен тұрақты негізде жұмыстар жүргізіп келеді. Әскери тәртіпке қадам басқан жасампаз елдің қайсар ұлқыздарына рухты, жігерлі, намысты болыңдар деген тілектер жолданды.
Әсел ҚҰСАЙЫНҚЫЗЫ QH.