ЖЕЛІ ЖҰЛДЫЗЫНА АЙНАЛҒАН ЖҰМЫСКЕР
Қарағандылық слесарь ән шырқап әлеуметтік желі жұлдызына айналды. Тәттімбет Жанат автопаркте бейнебаян түсіріп көпшілікті таңғалдырды.
Тәттімбет Жанат алғаш рет сахнаға 6 жасында қадам басыпты. Жұлдызын жаққан «Меңді қыз» – оның жетінші әні. Әдетте лирикалық бағытта шырқайтын әнші қазір той бизнесіне бет бұра бастаған. Хит болған бейнебаяннан кейін тапсырыс көбейе бастапты.
– Жұмысы, еңбегі ақталып жатқанына әр адам қуанады ғой. Расында, күтпедім осынша танымал болам деп, бірақ енді әрекетін істедік. Аллаға шүкір, бәрі жақсы шықты. Қуаныштымын, әрине. Мұнымен тоқтамаймыз. Әрі қарай тағы да жоспарлар жетерлік. Жаңа әндер, жаңа клиптер жасау ойда бар.
Тәттімбет 4 жылдан бері Қарағандыдағы №3 автопаркте жұмыс істейді. Слесарь автобустардың істен шыққанын жөндеп, сапалы қызмет етуін жіті қадағалайды. Бейнебаян түсіру идеясы келгенде ол бірден әріптестерімен бөліскен. Олар қуана қолдап, бас-аяғы 3 сағаттың ішінде роликті дайындап шыққан. Әріптестері Тәттімбеттің жұмысына жауапты, жан-жақты жігіт екенін айтуда.
– Тәттімбетпен бір жылдан астам уақыт жұмыс істеп келеміз, жақсы жұмыскер, еңбекқор. Шамасы келгенше бәрін де, музыкасын да алып жүреді. Тәттімбет екеуіміз танысқаннан бері осы музыкаларын, әндерін тыңдаймын, әндері жақсы. Кейіннен шыққан «Меңді қыз» деген әні бәрімізге ұнады, – дейді әріптесі Ардақ Ахметов.
Слесарь-әншіні хит туындысымен автопарк басшылығы қуана құттықтапты. Талантты азаматтарды қашан да қолдауға дайын екендерін айтып отыр №3 автопарктің ТЖО басшысы Серік Кзиденов.
– Тәттімбетті алдында да бір-екі тойда көргем. Той басқарған талантты жігіт болғаннан кейін бәрі жақсы болатынына сендім. Біздің автопаркте жігіттердің бәрі қолдайды. Арамызда неше түрлі жігіт бар: блогерлер де, әншілер де, жекпе-жекке қатысатын жігіттер де.
Слесарь-әнші басшылығы жұмыс орнына арнайы аппаратура орнатып, болашақ әндерін жазуға арналған қажетті құрылғыларды да сатып алып бергенін айтты.
Өнер мен қызметті қатар алып жүрген азамат отбасына да көңіл бөлуді ешақашан ұмытпайды. Ол – көпбалалы әке, отбасының тірегі. Алдағы уақытта Тәттімбет Жанаттың тағы бір әні көрерменге жол тартады. Қазір әнші жаңа бейнебаянның жоспарына дайындық үстінде.
Жанбота БЕЙСЕНБАЙ,«QH»