Жастар үшін жаңа мүмкіндік!

Қазақстанда «Жас кеңес сыйлығы – 2025» байқауына өтінім қабылдау басталды. Бұл бастама елдің қоғамдық өміріне белсенді араласқан және түрлі салада жетістікке жеткен жастарды қолдауға бағытталған. Биыл сыйлықтың ерекшелігі – аталымдар саны көбейіп, жаңа бағыттар қосылды. Енді дәрігерлер, жас ғалымдар, ақпараттық технология мамандары, креативті индустрия өкілдері және атом өнеркәсібінде еңбек етіп жүрген жастар да өз бақтарын сынай алады.

Сыйлық Қазақстан Республикасы Президентінің жанындағы Жастар саясаты жөніндегі кеңестің бастамасымен тағайындалған. Байқауға еліміздің 35 жасқа толмаған барлық азаматы қатыса алады. Қарағанды облысы Жастар ресурстық орталығының Ақпараттық саясат және коммуникация бөлімінің басшысы Аслан Қабегеновтің айтуынша, комиссия мүшелері алдын ала тағайындалмайды. Президент жанындағы кеңестің құрамына түрлі саладағы жас сарапшылар кіреді және олардың жұмысы толық ашық жүргізіледі. Әр кезең бойынша жеңімпаздардың есімі әлеуметтік желілерде жарияланып отырады.

Биыл аталым саны 7-ден 10-ға дейін артты. Марапатталатын негізгі салалар: медицина, білім, агроөнеркәсіп, өндіріс, энергетика, құтқару қызметі мен IT бағыты. Байқау үш кезеңнен тұрады. Әр аталымнан екі жеңімпаз анықталып, барлығы 20 жеңімпаз марапатталады. Жүлде қоры – 20 миллион теңге, әр жеңімпазға 1 миллион теңгеден беріледі.

Аслан Қабегенов жастарға өтінімді дұрыс толтырудың маңыздылығын еске салды. «Көп жағдайда өтінімді қате толтыру себепті қайтарып жатады. Егер өтінімді толтыруда қиындық туса, біздің облыстың кез келген қаласы мен ауданындағы жастар ресурстық орталықтарына жүгінуге болады. Мамандар әрдайым көмектесуге дайын», – деді ол.

Өтінім қабылдау 20 маусымда басталып, 20 шілдеге дейін жалғасады. Қатысушылар өтінімдерін онлайн түрде jas-kenes.kz сайтында бере алады. Ұйымдастырушылардың айтуынша, бұл сыйлық өз салаңда үздік екеніңді дәлелдеудің үлкен мүмкіндігі. Сондықтан белсенді әрі мақсатты жастарды байқауға қатысуға шақырады.

Ералы ҒАНИ,

«QH»