Жаңа жыл түнінде он сәби дүниеге келді

Қарағанды облысының перинаталдық орталықтарында 31 желтоқсаннан 1 қаңтарға қараған түні он сәби дүниеге келді. Оның ішінде алты ұл мен төрт қыз бар.

Он сәбидің жетеуі Пришахтинскідегі № 2 перинаталдық орталықта дүниеге келді. Дәрігерлердің айтуынша, барлық босанған әйелдер мен сәбилердің жағдайы жақсы.

– Бізде жеті бала дүниеге келді. Бес ұл және екі қыз. Соңғы жылдары ұлдар көбірек дүниеге келіп жатыр. Бес ана сәбиімен үйіне шығарылды. Барлық балалар сау, – дейді № 2 Перинаталдық орталықтың басшысы Жарқын Нұркеева. – Бізде үшінші деңгейдегі перинаталдық орталық болғандықтан, науқастарға жайлы жағдай жасауға тырысамыз, жеке күтім қамтамасыз етеміз. Біздің дәрігерлер үнемі біліктілігін арттырып отырады, бізге үнемі лекторлар келеді.  Биылғы жылы демеушілік көмектің арқасында 21 желтоқсан мен 31 желтоқсан аралығында біз «Жаңа жылдық сәби» байқауын өткіздік, енді 6 немесе 7 қаңтарда ОКБ сайтында нәтижелерді жариялаймыз. Сондай-ақ, 31 желтоқсаннан 1 қаңтарға дейін босанғандардың барлығына біз демеушілерден тәтті сыйлықтар бердік.

Қарағандылық Валентина Зайцеваның бұл екінші сәбиі. Ол бірінші рет кесарь тілігі арқылы босанған. Ал бұл жолы ол өздігінен босана алды. Қызы Кира 36-шы аптада дүниеге келді.

– Бастапқыда мерекеде босанып қаламын деген толқу болды. Бірақ медицина қызметкерлерінің қолдауы мен олардың сауатты әрекеттерінің арқасында барлығы ойдағыдай өтті, – дейді Валентина.

Гүлбаршын Төребекова 44 жаста. Ол төртінші рет босанды. Әйелге кесарь тілігі жасалды. Оның ұлы үш келіге жуық салмақпен дүниеге келді.

– Он жыл бұрын менің тағы бір ұлым осында дүниеге келген. Бұл екінші кесар тілігі. Барлығы сәтті өтті. Дәрігерлер мен мейірбике қызметкерлері өте білікті және мейірімді. Сәбиімнің де, өзімнің де жағдайымыз жақсы. Жай-жайдан үйімізге шығуға дайындалып жатырмыз. Ұлымның есімін күйеуім қойды, оны Омар деп атадық, – деді Гүлбаршын.

Өткен жылы № 2 Перинаталдық орталықтың медицина қызметкерлері үш мыңнан астам сәбидің дүниеге келуіне көмектесті.