Жаңа зауыт салынады

Қарағанды облысында теледидар, электрлі сужылытқыш, шаңсорғыш, асүй плитасы, шағын пеш, асүй сорғышы, кіржуғыш машина және басқа да тұрмыстық техника шығарылады деп көзделіп отыр. Жылына 1,1 млн дана өнім шығарылады деп жоспарлануда.

Болашақ Artel зауыты Саран қаласында пайда болады. Биыл күзде оның құрылысы басталуы тиіс.

Қарағанды облысының әкімдігінде өткен кеңесте жаңа инвестициялық кәсіпорындар туралы айтылды.

Өңірде барлығы 212,7 млрд теңге сомасына 11 инвестициялық жоба, оның ішінде шетелдік капиталдың қатысуымен 5 жоба жүзеге асырылып жатыр. Оларды іске қосудың арқасында екі мыңға жуық тұрақты жұмыс орнын ашуға мүмкіндік пайда болады.

– Солардың бірі ретінде импорт алмастырушы жоба іске қосылды. Бұл – «Сарыарқа» ЕЭА аумағында 30 жұмыс орнын құруды қарастыратын «Алтын Арна Geosynthetics» ЖШС геомембрана шығару жобасы, – деп атап өтті Өнеркәсіп және индустриялық-инновациялық даму басқармасының басшысы Мұрат Қыдырғанбеков.

Оның айтуынша, жыл соңына дейін Балқашта сағатына 50 МВт-қа дейін қуат өндіретін күн электр станциясы іске қосылады. 20 адам жұмыспен қамтылады.

Саран қаласында қағаз негізіндегі санитарлық-гигиеналық өнім өндірісі жолға қойылады. Қазір шикізат шетелден сатылып алынады, ал келешекте олар қағаз негізді өз бетінше дайындайтын болады. Есеп бойынша, бұл зауыттың қуатын жылына 21,4 мың тоннаға дейін арттыруға мүмкіндік береді.

Кәсіпорын – моноқалаларды дамыту, «Бизнестің жол картасы» мемлекеттік бағдарламаларының қатысушысы. Компания 100 жаңа жұмыс орнын ашады.

Өңірде сонымен қатар катодты мыс өндірілетін болады. Жаңа зауыттың қуаттылығы жылына 5 мың тоннаға дейін катодты мыс шығаруға жетеді. 140 жұмыс орны құрылады.

Сондай-ақ жыл соңында «Татнефть» компаниясының қатысуымен және 1 116 жұмыс орнын құрумен KamaTyresKZ шина зауытын іске қосу күтілуде.

– Жалпы, бірінші жартыжылдықта жұмылдырылған инвестиция көлемі 264 млрд теңгеден асты. Жыл соңына дейін өткен жылға қарағанда 5,5% өсіммен 732,5 млрд теңге инвестиция тарту жоспарланған. Бұл жобаларды іске қосу өндіріс көлемін ұлғайтуға, шикізаттық емес экспорттың өсуіне айтарлықтай ықпал етпек.

Облыс әкімінің баспасөз қызметі