«Қылмыстық топ»: Қарағандыда «Қазақмысты» тонаған 20 адам ұсталды

Аймақтың өнеркәсіптік кәсіпорындарында ұрлықпен айналысқан қылмыстық топ ұсталды. ҚР Ішкі істер министрлігі Ұлттық қауіпсіздік комитетімен бірлесіп, Қарағанды облысы прокуратурасының үйлестіруімен өнеркәсіптік компаниялардан, оның ішінде «Қазақмыстан» металл және тауар ұрлаумен айналысқан қылмыстық топты құрықтады.

Жергілікті криминалитеттен басқа қылмыстық әрекетке кәсіпорын қызметкерлері, оның ішінде қауіпсіздік қызметінің басшылары мен қызметкерлерінің қатысы бар деп күдіктелуде. Қылмыстық іс-әрекет салдарынан келтірілген залал анықталып жатыр.

– Қарағанды облысының полиция департаментіне 20-дан астам күдікті жеткізілді. Тінту шаралары барысында олардан атыс және травматикалық қару, автокөлік, қаражат және қылмыстық іс бойынша басқа да заттай дәлелдемелер тәркіленді. Тергеу мүддесі үшін өзге мәліметтер жария етілмейді, – деді ІІМ ұйымдасқан қылмысқа қарсы күрес департаментінің өкілі Қуандық Алпыс.

ІІМ қала құраушы кәсіпорындарда әрекет ететін қылмыстық топтарды анықтау және жолын кесу жұмыстарын жүйелі түрде жүргізеді. Айта кетері, бұған дейін Qarmet АҚ өкілдігінің аумағынан жанар-жағармай ұрлаумен айналысқан қылмыстық топ ұсталған болатын.

Жанбота БЕЙСЕНБАЙ, «QH»