Хайуанаттар бағында айдарлы мангобейлердің қатары толықты
Қарағанды хайуанаттар бағында қара айдарлы мангобей төлдеді. Өткен жылы хайуанаттар бағы БАӘ-де бір еркек пен екі ұрғашы мангобей сатып алған. Олар Арменияда карантиннен өтіп, Қарағандыға жеткізілді.
– Олардың есімдері Заза, Аза және Азиз. 12 қыркүйекте Азиз бен Зазаның төлі туылды. Бұл сақалды мангобейлер, орташа бойлы, өте ұзын құйрығы бар, дене бітімі әдемі келеді. Олардың маңдайында айдары бар. Өте шапшаң. Баласы әдемі, көздері қарақат тәрізді қап-қара болады. Біз осы маймылдарымыздың көбейгеніне қуаныштымыз. Бұл дегеніміз климатымыздың аталған маймылдарға сәйкес келетінін білдіреді. Біз үшін кез-келген төлдің дүниеге келуі– ерекше оқиға, бұл жануарлардың сирек кездесетін түрі, – дейді хайуанаттар бағының директоры Гүлнара Адамбекова.
Заза төрт жаста және бірінші рет төлдеп отыр. Ол баласын бір минутқа да қолынан шығармайды, баланы тамақтандырады және күтеді.
– Заза өте жақсы ана. Қазір толыққанды тамақтануда. Ол жидектер, жүзім, шабдалы және өрік жейді. Ол үшін тек баланы тамақтандыру керек, – дейді Гүлнара Адамбекова.
Мангобейлердің жүктілігі 6 айға созылады және оларда тек бір төл туады. Бес апта бойы ол анасының қарнында отырады, содан кейін ол айналадағы кеңістікті біртіндеп игере бастайды, бірақ ата-анасы оны кем дегенде 14 аптадан кейін ғана өзінен босатады.
Қара мангобей Ангола мен Конго Демократиялық Республикасының құрғақ тропикалық және субтропикалық ормандарында тұрады. Бұл түр барлық уақытын ағаштарда өткізеді. Кейде жерге түседі. Мангобейлер негізінен жемістер мен тұқымдарды жейді, жылдың кейбір айында олардың рационының едәуір бөлігі өсімдік шырынынан құралады.
Қанағат ЖИЕНҚҰЛОВА, «QH»