Дельфий ойындарынан жүлде

Қарағандылық Елдар Мақсұтбеков Коми Республикасы Сыктывкар қаласында өткен ІІІ Халықаралық Дельфий ойындарында «Ұлттық аспаптар» аталымы бойынша ел намысын қорғап, қола медальға ие болды. Аталған шараға әлемнің әр түкпірінен 600 өнерпаз қатысты.

Елдар – Тәттімбет атындағы Қарағанды өнер колледжінің «Халық аспаптары» бөлімінің 3 курс студенті. Аталған халықаралық шараға жолдаманы ол Қазақстан Республикасының XV ұлттық жастар Дельфий ойындарының республикалық іріктеу кезеңінде І орынды иеленіп, жеңіп алған болатын.

Елдар Мақсұтбеков бұған дейін де Astana-merey халықаралық орындаушылар байқауында І орын, ІҮ республикалық «Домбыра – Дастан» дәстүрлі күй байқауы І орындарды қанжығасы байлаған.

Құралай КӨБЕНОВА,

«QH»