Қазақстанда есту қабілеті бұзылған азаматтар есту аппараттарымен қамтамасыз етіледі
2025 жылғы 19 тамызда ҚР Денсаулық сақтау министрі жаңа бұйрыққа қол қойып, оториноларингологиялық және сурдологиялық көмек көрсету стандарттарына толықтыру енгізді. Бұдан кейін есту қабілеті бұзылған адамдар медициналық бұйымдармен қамтамасыз етіледі.
Жаңа ережеге сәйкес, мүгедектігі бар адамдарға есту аппараттары мен олардың ауыстыруы ҚР Еңбек және халықты әлеуметтік қорғау министрлігінің бұйрығына сәйкес жүргізіледі. Мүгедектігі жоқ адамдар үшін есту протездік көмекті жергілікті атқарушы органдар тағайындайды және сатып алады.
Есту аппараттарын, соның ішінде сүйек өткізгіштік аппараттарды ауыстыру олар орнатылғаннан кейін 4 жылдан кейін, ал ортаңғы құлақ пен сүйек өткізгіштік импланттарының сөйлеу процессорларын ауыстыру 5 жылда бір рет жергілікті бюджет есебінен жүзеге асырылады.
Жаңа бұйрық 2025 жылғы 1 қыркүйектен бастап қолданысқа енгізіледі.
Құралай ЖҰМАҒАЛИҚЫЗЫ,
«QH»