Қауіпті індетке дайындық – қоғам қауіпсіздігінің кепілі
Қарағанды қаласында аса қауіпті жұқпалы ауру – Конго-Қырым геморрагиялық қызбасына (КҚГҚ) қарсы оқу-жаттығу шарасы өткізілді. Шараға Қазыбек би атындағы аудандық санитариялық-эпидемиологиялық бақылау басқармасы, Қарағанды облыстық денсаулық сақтау басқармасына қарасты №5 емхана, «Ұлттық сараптама орталығы» филиалы және құқық қорғау органдары қатысты.
Оқу-жаттығу жұмыстарының басты мақсаты – медицина қызметкерлерінің төтенше жағдайда, яғни КҚГҚ індетінің күдікті жағдайы тіркелген сәттегі алғашқы іс-әрекеттер алгоритмін толық меңгеруі. Мұндай дайындық денсаулық сақтау жүйесінің әрекет ету тиімділігін арттырып қана қоймай, қауіпті инфекцияның таралуын болдырмауға үлкен септігін тигізеді.
Оқу-жаттығу барысында медицина қызметкерлері КҚГҚ-ға күдікті науқасты анықтау, оны оқшаулау, қорғаныш құралдарын пайдалану, әрі қарайғы диагностикалық және эпидемияға қарсы шараларды үйлестіре жүргізу әрекеттерін пысықтады. Бұл жаттығу 2022-2026 жылдарға арналған аса қауіпті және карантиндік жұқпалардың алдын алу жоспары аясында жүзеге асырылды.
– Бұл оқу-жаттығудың негізгі мақсаты – ауданымызда 2022-2026 жылдар аралығында аса қауіпті жұқпалы аурулардың келуін және таралуын болдырмауда мүдделі органдармен бірлесе әрекет ету, сондай-ақ медициналық қызметкерлердің осы ауруды дер кезінде анықтап, сауатты әрекет ету біліктілігін арттыру, қазіргі таңда Қарағанды облысы бойынша Конго-Қырым геморрагиялық қызбасы тіркелген жоқ. Алайда бұл ауру еліміздің оңтүстік аймақтарында табиғи ошақ ретінде белгілі, – деді Қарағанды қаласы Қазыбек би атындағы ауданның санитариялық-эпидемиологиялық бақылау басқармасының басшысы Жанар Беркімбаева.
Конго-Қырым геморрагиялық қызбасы – аса қауіпті вирустық инфекция. Ол адамға көбіне кене шағуынан, сондай-ақ науқастың қанымен немесе тіндерімен тікелей байланыста болу арқылы жұғады. Аурудың алғашқы белгілері – дене қызуының кенеттен көтерілуі, бас ауруы, бұлшық еттердің ауыруы, жүрек айнуы және кейде қан кетулер. Жағдай асқынған кезде мұрыннан, асқазаннан, тіпті ине салынған орындардан қан кетуі мүмкін.
Бұл инфекция көбіне көктем мен жаз мезгілдерінде тіркеледі. Сондықтан да алдын ала дайындық пен халық арасында ақпараттандыру шараларын күшейту – инфекциямен күрестегі маңызды қадам.
Қауіпті індетке қарсы мұндай шаралар қоғам денсаулығының қорғаныс қалқаны іспетті. Індетке қарсы күресте әр маманның іс-қимылы айқын әрі нақты болуы – адам өмірін сақтап қалудың кілті. Сондықтан осындай оқу-жаттығулардың маңызы зор, әрі алдағы уақытта да жалғасуы қажет.
Ералы ҒАНИ,
«QH»