Қарағандыда жылыту маусымы 1 қазанда басталады
Қазан айының жақындауымен Қарағандыда жылыту маусымына дайындық жұмыстары аяқталып келеді. Күндізгі ауа райы әзірге жайлы болғанымен, синоптиктер алдағы күндері температураның төмендейтінін болжап отыр. Осыған байланысты қалада жылыту маусымын 1 қазаннан бастап іске қосу жоспарланған.
Бұл туралы Қарағанды қаласының әкімі әлеуметтік желідегі парақшасында хабарлады.
Қала басшылығының мәліметінше, 1 қазанда барлық тұрғын үйге жылу бір мезетте беріле бастамайды. Қарағандының жылумен жабдықтау жүйесі ауқымды әрі күрделі болғандықтан, желілерді жылу тасымалдағышпен толтырып, қажетті жұмыс режиміне келтіру белгілі бір уақытты талап етеді.
Жылу алдымен әлеуметтік нысандарға – балабақшаларға, мектептер мен ауруханаларға беріледі. Одан кейін тұрғын үйлер кезең-кезеңімен жылу жүйесіне қосылады.
Жылыту жұмыстары Майқұдық, Сұрыптау және Пришахтинск аудандарынан басталып, кейін Оңтүстік, Оңтүстік-Шығыс және қала орталығына жалғасады. Жылу желілері іске қосылған сайын қалған тұрғын үйлер де ретімен қосылады.
Сондықтан 1 қазанда кейбір үйде жылу беріліп, ал көрші үйде әлі қосылмаған жағдайда алаңдауға негіз жоқ. Бұл жылу беру жұмыстарының кезең-кезеңімен жүргізілуіне байланысты. Ең бастысы – жүйені асығыс іске қосу емес, оны дұрыс реттеп, тұрақты жұмыс режиміне келтіру.
Сонымен қатар тұрғындарды толғандыратын маңызды мәселенің бірі – жылу ақысының есептелуі. Қалалық әкімдік түсіндіргендей, 1 қазаннан бастап барлық тұрғынға автоматты түрде жылу төлемі есептеле бермейді. Төлем нақты тұрғын үйге жылу берілген сәттен бастап есептеледі.
Жылыту маусымының тұрақты өтуі үшін көпқабатты үйлердің ішкі жылу жүйелерінің дайындығы да маңызды. Осыған байланысты басқарушы компаниялар мен тұрғын үйлерге жауапты ұйымдарға жылу жүйелерін тағы бір мәрте тексеріп, қалалық қызметтермен тұрақты байланыста болу тапсырылды.
Қалалық қызметтер өз кезегінде жылу тасымалдағышты беруді бастайды. Ал тұрғын үйлердің оны қабылдауға дайындығы – жылыту маусымын сапалы өткізуге әсер ететін маңызды фактор.
Қарағандыда жылу беру кезең-кезеңімен жүргізіледі. Сондықтан алғашқы күндері үйлердің қосылу уақытында айырмашылық болуы қалыпты жағдай. Жылу желілері реттеліп, жүйе қажетті режимге шыққан сайын жылу қаладағы барлық тұрғын үйге жеткізіледі.
Құралай КӨБЕНОВА,
«QH»