Қарағандыда демікпемен күрес жолдары талқыланды
Қарағандыда Халықаралық бронх демікпесімен күрес күніне орай маңызды конференция өтті. Жиынның басты мақсаты – медицина мамандары мен тұрғындардың бұл ауруды ерте анықтау, дұрыс бақылау және тиімді емдеу тәсілдері туралы ақпараттылығын арттыру. Шара барысында мамандар демікпенің асқынуын болдырмау жолдарын талқылап, алдын алу шараларына баса назар аударды.
Қарағанды облыстық клиникалық ауруханасының базасында өңірдің әр түкпірінен жетекші мамандар – аллергологтар, пульмонологтар, педиатрлар мен терапевттер бас қосты. Арнайы ұйымдастырылған медициналық конференция аясында бронх демікпесімен ауыратын балалар мен ересектер үшін Ашық есік күні өткізілді. Шараның басты мақсаты – тыныс алу жолдары ауруларын ерте анықтап, кәсіби кеңес беру арқылы тұрғындардың өмір сапасын арттыру.
– Бүгінде біздің клиникада балалар мен ересектердің түрлі ауруларын емдеуде тәжірибесі мол үздік мамандар қабылдайды. Мен – балалар пульмонологымын. Түскі астан кейін дәрігерлерге арналған арнайы іс-шаралар өтеді: семинарлар, дөңгелек үстелдер ұйымдастырылады. Бұл кәсіби деңгейімізді арттыруға және тәжірибе алмасуға мүмкіндік береді, – дейді «Облыстық клиникалық аурухана» КМК директорының орынбасары Қарлығаш Шариязданова.
Облыстық конференцияның бас спикері – профессор Елена Ковзель, Назарбаев Университетінің Медициналық орталығының иммунология және аллергология бағдарламасының жетекшісі, сондай-ақ Қазақстан Республикасының Денсаулық сақтау министрлігінің бас штаттан тыс аллерголог-иммунологы. Дәрігерлердің хабарлауынша, аймақта бронх демікпесімен ауыратын науқастардың саны жыл сайын артып келеді, бұл медициналық қоғамдастықтың тұрақты назарын және тиімді шараларды қажет етеді.
– Біз демікпені ерте анықтауды кем дегенде үш есе көбейтуіміз керек. Ерте кезеңдегі демікпенің белгілері жеңіл өтеді, сондықтан оны байқамау ықтималдығы жоғары. Алайда, өкінішке қарай, бұл ауру жастар арасында кең таралуда. Сондықтан, әсіресе балалар арасында демікпені уақтылы анықтап, тиімді емдеу – біздің басты міндетіміз. Әр бала үшін оның өмір сапасын жақсарту – ең бірінші мақсат, – дейді аллерголог-иммунолог Елена Ковзель.
– Қазақстан Республикасының Бас аллергологының қатысуы біз үшін үлкен мәртебе. Ол біздің көшбасшымыз әрі кәсіби бағыт-бағдар беруші. Бүгінгі күні біз пациенттермен де, дәрігерлермен де белсенді жұмыс істеп, бронх демікпесін алдын алу әдістері туралы кеңінен әңгімелеп жатырмыз. Бұл ауруды емдеудің тиімді жолдары бар, және біз соларды насихаттауға ерекше мән береміз, – деді аллерголог Ботагөз Нұрмұқанова.
Бұл кездесулер тек тәжірибе алмасудың айғағы ғана емес, сонымен бірге пациенттердің өмір сүру сапасын арттыруға бағытталған нақты қадам болып табылады. Республикалық деңгейдегі мамандар еліміздің бірнеше қалалары мен өңірлеріне барып, өз білімдері мен тәжірибелерін бөлісуде. Осындай ғылыми-практикалық шаралар алдағы уақытта да өз жалғасын табады.
Қанағат ЖИЕНҚҰЛОВА,
«QH»