Қарағанды облысында үздік колледж студенттері анықталды
Қарағанды облысының ең үздік он колледж студенті таңдалды. Олар «Қазақстан Республикасы колледждерінің үздік 100 студенті» байқауында өңірдің намысын қорғайды.
ҚР Білім министрлігі бекіткен бұл дәстүрлі байқаудың облыстық кезеңіне аймақтағы 23 колледжден 69 студент қатысты. Қатысушылар ұсынған уәждемелік хаттар мен бейнероликтерді саралай отырып, қазылар алқасы үздіктерді анықтады. Байқаудың негізгі талаптарының бірі – ұлттық құндылықтарды насихаттау және кәсіби дағдыларды көрсету болды.
– Мен музыкалық білім беру мамандығы бойынша оқимын, сондықтан өз бейнемде қазақтың дәстүрлі музыкасын және ұлттық өнерді зерттеуді басты назарға алдым. Алайда, менің ойымша, жеңіске жетуге тек бұл ғана емес, сонымен қатар менің портфолиом да ықпал етті. Мен белсендімін, түрлі байқауға, оның ішінде WorldSkills жарыстарына қатыстым, – дейді Қарағанды жоғары гуманитарлық колледжінің студенті Мәдина Кәрімова.
Облыстық кезеңнің қорытындысы бойынша республикалық деңгейде өңірдің намысын қорғайтын он студент анықталды. Олар: Аяна Кәдірбаева, Бекарыс Спабеков, Мәдина Кәрімова, Ернар Ризабек, Әйгерім Берікбол, Әнел Тикенова, Разия Әбдуәлі, Айбар Жоланов, Гүлпахат Құттыбаева және Нұрдос Түсенов.
Республикалық кезеңде қатысушылардың жұмыстары бірнеше бағыт бойынша бағаланады: білім беру, өнер және гуманитарлық ғылымдар, денсаулық сақтау және әлеуметтік қамсыздандыру, жаратылыстану ғылымдары, математика мен статистика, ақпараттық-коммуникациялық технологиялар, бизнес, басқару және құқық, әлеуметтік ғылымдар мен ақпарат, ауыл шаруашылығы, ветеринария, сондай-ақ инженерия, өңдеу және құрылыс салалары.
– Бұл кезеңде біз өз жобамызды таныстыруымыз қажет. Қазіргі таңда мен тақырып таңдау үстіндемін және дайындалуға уақытым жеткілікті. Әрине, жеңіске жетуге үміттімін, – деп өз әсерімен бөлісті Мәдина Кәрімова.
Жеңімпаз атанып, үздік 100 студенттің қатарына енгендер ҚР Білім министрлігі ұйымдастыратын тренингтерге, шеберлік сабақтарына және семинарларға қатысу мүмкіндігіне ие болады.
Құралай ӘЛЖАППАР,
«QH»