Қала көркі: жаңа жобалар мен абаттандыру жұмыстары
Қала көшелерін жаңарту мен абаттандыруға бағытталған ауқымды жобалар жүзеге асырылуда. Станиславский көшесіндегі жаңа өзгерістер қала келбетін жақсартуға септігін тигізеді. 2025 жылға арналған жоспарлар туралы Қазыбек би ауданы әкімдігінде кеңінен талқыланды.
Биыл қаладағы басты даңғыл бойында ауқымды құрылыс жұмыстары жүргізіліп, бірқатар маңызды жоба іске асырылуда. «Абсолют» сауда орталығы мен «Шахтер» стадионы алдындағы алаңдарды жаңарту басталып, өзгерістер айқын көріне бастады.
– Өткен жылы біз қала инфрақұрылымын жақсарту бойынша алғашқы қадамдарды жасадық, ал биыл бұл жұмыстар жалғасын табуда. Жобалардың нәтижесінде қала тұрғындары үшін жайлы орта қалыптасады. Біз жұмыс сапасы мен мерзімдерін қатаң бақылауда ұстаймыз, – деді Қазыбек би атындағы аудан әкімі Ералы Оспанов.
Сонымен қатар, Панорама және Нұркен Әбдіров атындағы спорт кешенінің маңында да кешенді абаттандыру жұмыстары жүргізілді. Бұрын бұл аймақтарда кездескен мәселелер алдағы уақытта ұмыт болмақ.
– Бұл аумақтарда толыққанды жаңарту жұмыстары жасалды. Біздің басты мақсатымыз – қала тұрғындары үшін қолайлы әрі заманауи орта қалыптастыру. Биыл бұл жұмыстар толықтай аяқталатын болады, – деп атап өтті аудан әкімі.
Атқарылған жұмыстардың нәтижесінде 100 пайызға жуық өзгерістер орын алды: тротуар плиткалары төселді, 150 ағаш отырғызылды, заманауи жарықтандыру жүйесі орнатылды. Атмосфералық жағдайды жақсарту мақсатында жаз айларында радиорубкадан музыка ойнатылатын болады.
Тағы бір маңызды жоба – Станиславский театры алдындағы алаңның жаңаруы. Бұл орын тек театрсүйер қауым үшін ғана емес, барлық қала тұрғыны үшін демалыс орнына айналмақ. Облыс әкімінің тапсырмасына сәйкес, 2025 жыл Оңтүстік-шығысты дамыту жылы деп жарияланды. Осыған байланысты урбанистермен бірлесіп, жаяу жүргіншілер қозғалысының картасы әзірленді. Бірінші кезеңде Корзинадан 3-ші емханаға дейінгі жаяу жүргіншілер жолы ретке келтіріледі, кейінірек Норма маңындағы саябаққа дейінгі жолдар да жаңартылады. Сонымен қатар, дүкендер мен аялдамаларға апаратын жолдар да жақсартылып, қоқыс тастау мәселесі де реттеледі.
Жоспарланған жобалар қаланың көркеюіне айтарлықтай үлес қосып, тұрғындардың өмір сүру сапасын жақсартуға бағытталған.
Қанағат ЖИЕНҚҰЛОВА,
«QH»