Қала дамуының жаңа бағыты
Қарағандының келбеті соңғы жылдары біртіндеп өзгеріп келеді. Қала аумағында жаңа тұрғын аудандар бой көтеріп, жол және инженерлік желілер жаңартылып, қоғамдық кеңістіктер көбейіп жатыр. Бұл жұмыстардың маңызды бөлігі – шаһарды жайлы әрі қауіпсіз ортаға айналдыруға бағытталған.
Қала дамуының негізгі жобаларының бірі – Оңтүстік-Шығыс пен Майқұдықтың ортасында салынатын Экопарк. Аумағы 120 гектарды құрайтын жаңа қоғамдық кеңістік Қарағандының жасыл белдеуін кеңейтіп қана қоймай, екі ірі ауданның арасындағы байланысты күшейтпек. Салыстыру үшін, қаланың Орталық саябағының аумағы 90 гектар.
Экопарк аумағында демалыс орындары, жағалау, веложолдар, воркаут-аймақтары және басқа да қоғамдық кеңістіктер қарастырылған. Жоба кезең-кезеңімен жүзеге асырылмақ. Қазірдің өзінде аумаққа алғашқы 10 мың ағаш көшеті отырғызылған. Алдағы уақытта олардың санын 100 мыңнан астамға жеткізу жоспарланып отыр.
Алдағы жылдары бұл аумақта экологияға басымдық берілген толыққанды қоғамдық кеңістік қалыптастыру көзделіп отыр.
«Алдағы 3-5 жылда бұл аумақта экологияға басымдық берілген, тұрғындардың демалуына қолайлы толыққанды қоғамдық кеңістік қалыптасуы тиіс», – дейді Қарағанды қаласының әкімі Мейрам Кожухов.
Жоба тек көгалдандырумен шектелмейді. Экопаркпен қатар аумақта жаңа тұрғын үйлер, жолдар мен спорт нысандары салынуда. Жоспар бойынша 55 тұрғын үй бой көтеріп, тоғыз спорт нысаны іске қосылады.
Спорт инфрақұрылымы да ауқымды болады. Мұнда жабық футбол алаңы, екі ашық жаттығу алаңы, спорт академиясы және УЕФА-ның 4-санатына сәйкес келетін стадион салу жоспарланған. Мұндай нысан республикалық және халықаралық деңгейдегі жарыстарды өткізуге мүмкіндік береді.
Сонымен бірге әмбебап спорт аренасы, жеңіл атлетика манежі, Мұз сарайы, бассейн және инклюзивті спорт орталығы бой көтермек. Осылайша жаңа аумақ тұрғындардың демалысы мен спортпен айналысуына арналған бірнеше бағытты бір жерге шоғырландырады.
Қала құрылымындағы өзгерістер тұрғын үй және спорт нысандарымен ғана шектелмейді. Экопарктың маңындағы аумақтың дамуы Оңтүстік-Шығыс пен Майқұдық арасындағы көлік және әлеуметтік байланысты күшейтуге мүмкіндік береді. Ал жаңа Солтүстік-Шығыс ауданының қалыптасуы Қарағандының кеңістіктік дамуына жаңа серпін бермек.
Қаланың экологиялық ахуалын жақсарту үшін көгалдандыру жұмыстарының маңызы зор. Әсіресе өндірістік өңір саналатын Қарағанды үшін жасыл аймақтарды көбейту – қалалық ортаның сапасына тікелей әсер ететін бағыттардың бірі.
Дегенмен қаланың жайлылығы тек саябақтар мен жаңа ғимараттарға байланысты емес. Инженерлік инфрақұрылымның жағдайы да тұрғындардың күнделікті өміріне тікелей әсер етеді. Осы бағытта облыста ауқымды жаңғырту жұмыстары қолға алынған.
«Қаланың дамуы тұрғын үй құрылысымен ғана шектелмеуі керек. Жаңа аудандармен бірге жол, инженерлік желі, әлеуметтік және спорттық нысандар да қатар салынуы маңызды», – деп атап өтті облыс әкімінің бірінші орынбасары Азамат Тайжанов.
Қарағанды облысы әкімінің бірінші орынбасары Азамат Тайжановтың мәліметінше, биыл өңірде барлық қаржыландыру көздері есебінен жалпы құны 223 миллиард теңге болатын 108 жоба жүзеге асырылуда. Олар 438 шақырым инженерлік желіні қамтиды.
Энергетика және коммуналдық секторларды жаңғыртудың ұлттық жобасы аясында 14 жоба іске асырылып жатыр. Бұған қоса бюджет қаражаты есебінен 33 жоба, ал табиғи монополиялар субъектілерінің инвестициялық жобалары арқылы 61 жоба жүзеге асуда.
Жаңғырту жұмыстары жылу энергетикасы нысандарын да қамтиды. Теміртаудағы №2 жылу электр орталығы, сондай-ақ Балқаш пен Шахтинск қалаларындағы жылу-электр орталықтары бойынша қажетті жұмыстар жүргізіліп, олардың техникалық жағдайын жақсартуға бағытталған шаралар атқарылды. Келесі кезеңдегі маңызды міндеттердің бірі – Қарағанды 1-ГРЭС-ін жаңғырту.
Бұл жұмыстардың нәтижесі тұрғындардың күнделікті тұрмысынан көрінуі тиіс. Себебі заманауи қала дегеніміз – жаңа ғимараттар мен көрікті көшелер ғана емес, тұрақты жылу, су, электр энергиясы, сапалы жол және қауіпсіз қоғамдық кеңістік.
Қарағандының бүгінгі даму бағыты осы міндеттерді қатар алып жүруге негізделген. Бір жағынан, қалада жаңа аудандар мен әлеуметтік нысандар салынып, қоғамдық кеңістіктер көбейіп жатса, екінші жағынан, ондаған жыл бойы пайдаланылып келе жатқан инженерлік желілер жаңғыртылуда.
Ал 120 гектарлық Экопарк секілді жобалар шаһардың экологиялық және қоғамдық кеңістігін кеңейтуге бағытталған. Жаңа тұрғын аудандар, спорт нысандары мен көгалдандырылған аумақтар өзара сабақтасып, Қарағандының болашақ келбетін қалыптастыра түспек.
Қаланың жаңаруы – бір күнде жүзеге асатын жұмыс емес. Бұл ұзақ мерзімді жоспарды, жүйелі қаржыландыруды және инфрақұрылымды кезең-кезеңімен жаңғыртуды талап етеді. Бүгін қолға алынған жобалардың нәтижесі алдағы жылдары Қарағанды тұрғындарының өмір сүру ортасынан көрінері анық.
Құралай ЖҰМАҒАЛИҚЫЗЫ,
«QH»