Ең төменгі жалақыны көтеру мәселесі талқылану үстінде
Қазақстанда ең төменгі жалақыны 150 мың теңгеге дейін көтеру туралы ақпарат әзірге нақты шешім емес. Бұл жөнінде Еңбек және халықты әлеуметтік қорғау министрі Асқарбек Ертаев мәлімдеді.
Министрдің айтуынша, аталған көрсеткіш – қол жеткізуге бағытталған мақсатты меже ғана. Қазіргі уақытта ең төменгі жалақыны айқындаудың жаңа әдістемесі әзірленіп, мүдделі мемлекеттік органдардың қарауына жолданған.
Жаңа тәсіл бойынша ең төменгі жалақы көлемі екі негізгі көрсеткішке – медианалық жалақы мен еңбек өнімділігіне сүйене отырып есептеледі. Бұл тетік жалақының ел экономикасының даму қарқынына сәйкес кезең-кезеңімен өсуіне мүмкіндік береді.
Қазір мемлекеттік органдар ықтимал өсімнің бюджетке, әлеуметтік төлемдерге, міндетті аударымдарға және жұмыс берушілердің шығындарына әсерін жан-жақты сараптап жатыр.
Министрдің сөзінше, ең төменгі жалақыны көтеру туралы түпкілікті шешім барлық экономикалық есептеулер мен ведомствоаралық талқылаулар аяқталғаннан кейін қабылданады. Әзірге оның нақты мөлшері мен енгізілетін мерзімі белгіленген жоқ.