Су басу салдарынан жер учаскелері зардап шекті
Майқұдықтағы «Оптимист» саяжай алқабында ауызсудың жайылуы салдарынан шамамен 60 жер учаскесі зардап шекті, сондай-ақ төрт көшенің жол жабыны бұзылған. Тұрғындар жер телімдерінен айырылып қалу және үйлеріне қауіп төнуі мүмкін деген алаңдаушылық білдіруде.
«Қарағанды Су» компаниясына қарасты №4 су құбырының жарылуы салдарынан саяжай аумағын су басқан. Тұрғындардың айтуынша, бұл мәселе бірнеше жылдан бері қайталанып келеді. Судың салдарынан жердің құнарлылығы төмендеп қана қоймай, инфрақұрылымға да айтарлықтай зиян келуде.
– Мәселе қыс пен жаз мезгілдерінде де қайталанып, аумақты су басу жағдайы үздіксіз байқалады. Мемлекет басшысы бірнеше рет су ресурстарын ұқыпты пайдалану және оларды сақтау қажеттігін атап өткен болатын. Алайда жергілікті жағдайға қарағанда, бұл талаптардың толық орындалмай отырғаны байқалады. Тұрғындардың айтуынша, тиісті ұйымдар мен жергілікті билік тарапынан нақты шаралар жеткілікті деңгейде қабылданбаған. Олар бұл мәселе бойынша ұзақ жылдар бойы мемлекеттік органдарға жүгінгенімен, су құбыры әлі күнге дейін толық жаңартылмаған, – деді «Оптимист» ПИК төрағасының міндетін атқарушы Иван Коровин.
Егоровтар отбасы саяжайды төрт жыл бұрын сатып алған. Сол уақыттан бері олар жаз мезгілінде қайталанып отыратын су басу мәселесімен тұрақты түрде күресіп келеді.
– Жиі қайталанатын су басу жағдайлары тек топыраққа ғана емес, саяжай аумағындағы құрылыстарға да кері әсерін тигізуде. Көптеген ескі үйлерде қабырғалар мен іргетастарда жарықтар пайда болып, олардың жағдайы едәуір нашарлаған, – дейді тұрғын Татьяна Егорова.
Үнемі қайталанатын су тасқыны тек топыраққа ғана емес, тұрғын үйлерге де зиянын тигізіп жатыр. Ескі үйлердің қабырғалары мен қасбеттерінде жарықтар пайда болған. Бұл жағдайдан әбден қажыған кейбір тұрғындар өз жер телімдерін тастап кетуге мәжбүр болып отырғанын кооператив мүшелері айтады. «Қарағанды Су» компаниясының өкілдері зақым келген учаске оқшауланғанын хабарлады. Дегенмен олардың айтуынша, мұндай апаттардың алдын толықтай алу мүмкін болмай отыр.
– Аталған су құбыры 1974 жылы іске қосылған. Қызмет ету мерзімі әлдеқашан екі рет асып кетсе де, осы уақытқа дейін күрделі жөндеу жұмыстары жүргізілмеген. Қазіргі таңда диаметрі 1 200 мм болатын екі жаңа құбырдың жобалық-сметалық құжаттамасы әзірленіп жатыр. Жобаға қаржы бөлу үшін өтінім дайындалып, ол ұлттық «Энергетика және коммуналдық секторларды жаңғырту» бағдарламасы аясында жүзеге асырылмақ. Қажетті қаржыландыру бөлінген жағдайда, жобаны 2027 жылға дейін аяқтау жоспарланып отыр, – дейді «Қарағанды Су» ЖШС директорының орынбасары Денис Калиничев.
Компания өкілдерінің мәліметінше, магистральдық су құбырының шамамен алты шақырымын жаңарту үшін 9 миллиард теңге көлемінде қаржы қажет. Алайда бұл қаражаттың бөлінуі әзірге нақты бекітілген жоқ.
Қанағат ЖИЕНҚҰЛОВА,
«QH»