Тунисте топ жарған Әмір

Қарағандылық жас спортшы Әмір Омарханов Тунисте өткен ITF M15 санатты халықаралық турнирде топ жарып, ел абыройын асқақтатты. Жасы небәрі 18-де болса да, кәсіби теннистегі алғашқы ірі жетістігіне қол жеткізген отандасымыз Монастир қаласында өткен бәсекеде нағыз шеберлігін көрсетті. Финалда Германиядан келген Макс Шёнхаусты үш сетке созылған тартысты ойында 6:3, 3:6, 6:4 есебімен тізе бүктіріп, өзінің алғашқы жекелей титулын жеңіп алды. Бұл жеңіс оның мансабындағы маңызды белестердің бірі ғана емес, алдағы уақытта үлкен ареналарға жол ашатын тарихи сәт болды.

Турнир барысында Әмір өзіне тән сенімділігін дәлелдей білді. Жартылай финалда ол тағы бір неміс спортшысы Мик Петковичті 6:1, 6:2 есебімен оңай ұтып, финалға айқын фаворит ретінде жолдама алды. Осындай жоғары деңгейдегі қарсыластарды бірінен соң бірін жеңу жас теннисшінің дайындық деңгейін, тактикалық ойынын, әрі психологиялық төзімділігін көрсетеді. Бұл – оның ұзақ жылдар бойы жинаған еңбегінің нәтижесі. Әмір Қарағандыда теннистің негізін меңгеріп, кейін әлемдік деңгейдегі Жанко Типсаревич академиясында жаттығып, шеберлігін шыңдаған болатын.

Бұған дейін де ол жасөспірімдер арасындағы халықаралық жарыстарда өзін көрсеткен. Қытайдағы China Open J300 турнирінде топ жаруы, сондай-ақ атақты Orange Bowl жарысында жұптық сында жеңіске жетуі – оның әлеуетінің жоғары екенін білдіреді. Осындай жетістіктер қатары енді кәсіби турнирлердегі жеңістермен толығып келе жатыр. Әлемдік рейтингте жоғарылауға, ATP турнирлеріне қатысуға және Қазақстанның үздік теннисшілерінің қатарынан көрінуге деген мүмкіндігі күн сайын артып келеді.

Омархановтың Тунисте қол жеткізген жеңісі жалпы отандық теннистің дамуындағы маңызды кезең. Жас дарындардың халықаралық деңгейде өздерін көрсетуі елімізде теннис спортының қарқынды дамып келе жатқанының белгісі. Әмірдің табандылығы, еңбекқорлығы және жеңіске деген жігері көптеген жас спортшыларға үлгі болатыны сөзсіз.

Ералы ҒАНИ,

«QH»