Шахтадағы спорт шебері

Оқылды: 41

Адам тағдыры – қайсарлық пен еңбектің тоғысқан көрінісі. Біздің бүгінгі кейіпкеріміз – спорт пен еңбекті қатар ұштастыра білген азамат. Бұрынғы бапкер, бүгінде кенші болып жұмыс істеп жүрген Айдын Жанатов жастайынан спортқа беріліп, шәкірт тәрбиелеуде талай жетістіктерге жеткен.

Қазір ол шахтада еңбек етіп жүрген қарапайым кенші. Қара алтын өндірісінде жүріп, ел экономикасына өз үлесін қосып келеді. Жер астындағы жұмыс – ерік-жігердің, нағыз табандылықтың мектебі. Мұндай ауыр еңбекті еңсере білу екінің бірінің қолынан келе бермейді. Айдынның айтуынша, шахтадағы ең басты күш бірлік пен ұжымдық қолдау.

– Кенші болу оңай емес. Бұл жер нағыз төзімділіктің сыналатын жері деп ойлаймын. Дегенмен, ұжымым өте жақсы. Әріптестеріммен тез тіл табысып, жұмыла жұмыс жасап кеттік, – дейді ол.

Айдын Жанатовтың өміріндегі тағы бір үлкен белес – спорт. Ол жауынгерлік джи-джитсудан Қазақстан атынан халықаралық жарыстарға қатысып, ел намысын абыроймен қорғады. Әлем кубогында күміс жүлдеге ие болып, туған жерінің мерейін асырды. Шахтадағы қажыр мен төзімділік татамиде де шыңдалды десек артық емес.

Жиырма жыл бойы балаларды жаттықтырған бапкер көптеген чемпион тәрбиелеп шығарды. Оның шәкірттері республикалық, тіпті халықаралық додаларда жеңіс тұғырынан көрініп жүр. Әр шәкіртінің жетістігі Айдынның еңбегінің айғағы.

– Спортпен кәсіби тұрғыда айналысып жүрген кездерім әрдайым есімде. Өзімнің жетістігімнен бөлек, 200-ден аса республикалық, халықаралық жарыстарда чемпиондарды тәрбиеледім. Спорт – өмірімнің бір бөлшегі. Әлі күнге дейін бос уақытым болса, спорт залға барып тұрамын, – дейді ол.

Айдын Жанатов – бес баланың әкесі. Оның өмірдегі ең басты тірегі – отбасы. Жұбайы да спорттан алыс емес, спорт шеберлігіне кандидат, әрі өмірлік серігі, сенімді кеңесшісі. Ол үшін отбасы ең үлкен жетістік, ең қымбат марапат.

Бүгінде Айдынның өмір жолы жастарға үлгі. Шахтадағы қажырлы еңбек, спорттағы табыс пен бапкерлік жол бәрі бір адамның бойында тоғысқан. Ол – қарапайым кенші ғана емес, үлкен жүректі азамат. Осындай қайсар тұлғалар ел ішінде көп болса, қоғамымыздың болашағы да берік болмақ.

Ералы ҒАНИ,

«QH»