«TARTYL FEST»: Майқұдықта күш пен жігер додасы өтті

Майқұдық саябағында ерекше спорттық доданың куәсі болдық. Қазақстан Конституциясының 30 жылдығына орай ұйымдастырылған «TARTYL FEST» турнирі – спортты серік еткен азаматтарды бір арнаға тоғыстырды. Жүлде қоры 1 миллион 800 мың теңгені құрап, қатысушыларға жеңіс қуанышы мен жаңа серпін сыйлады.

Турнирдің басты артықшылығы – кернеуге тартылу спортының қолжетімділігінде. Арнайы зал немесе қымбат жабдық қажет емес. Бүгінде кез келген аулада турник бар, демек, кез келген жас сол жерде жаттығып, өзін шыңдай алады.

Қазақстан Ұлттық пауэрлифтинг ассоциациясының президенті Никита Полищук атап өткендей:

«Адамға эмоция әрдайым қажет. Біз жастардың оны тек оң жолдан алуына ықпал еткіміз келеді. Спортшы тәртіпті, жігерлі, мақсатшыл адам. Мұндай шараларға құқық қорғау органдары да қатысып, профилактикалық жұмыстар жүргізеді».

Спортшылар салмақ дәрежесі бойынша үш топқа бөлініп, шымыр денелерін, шыныққан мінездерін көпшілікке көрсетті. Қатысушылардың бірі Данил Дизендорф өзінің тәжірибесін бөлісті.

«Турникке тартылу маған қиынға соқпады. 9 жасымнан бері аулада шынықтым. Дәл қазір 28 рет тартылдым, ал ең жоғарғы көрсеткішім – 34 рет», деді ол.

«Біз кез келген аулада спортқа деген қызығушылықты арттыруға тырысамыз. Мұндай турнирлер қатысушыларға тек физикалық дайындықты емес, рухани шыңдалуды да береді», – дейді Жастар ресурстық орталығының басшысының орынбасары Ғазиз Зұлхарнай.

Стритлифтинг спорт шебері Эдуард Громко ой бөлісті: «Қазір жастардың көбісі телефон мен интернетке әуестенген. Ал турникке тартылу – денсаулыққа, сергектікке жол ашатын тамаша мүмкіндік. Аулада, саябақта орналасқан мұндай алаңдардың саны жеткілікті. Сылтау жоқ, әрекетке көшіңіздер!»

«TARTYL FEST» фестивалі – тек спорттық дода емес, күш пен жігердің, тәртіп пен шыдамдылықтың көрінісі болды. Жеңімпаздар марапаттарын алып, ал қалғандары да келешекке жаңа мотивациямен оралды.

Қанағат ЖИЕНҚҰЛОВА,

«QH»