Құтқарушыларға құрмет: төтенше жағдайдағы бір күн – үш күнге тең

13 тамыз 2025 жылы Қазақстан Республикасының Төтенше жағдайлар министрлігі №317 бұйрықты бекітіп, төтенше жағдайлар мен қарулы қақтығыстар кезінде қызмет ететін азаматтық қорғау органдарының қызметкерлері мен әскери қызметшілеріне ерекше жағдайдағы қызмет пен төлемдерді есептеу тәртібін анықтады. Бұл шара 29 тамыздан бастап күшіне енеді, деп түсіндірді ТЖМ баспасөз қызметі.

Жаңа ережеге сәйкес, өрт сөндіру, табиғи апаттарды жою, антитеррористік операциялар немесе қарулы қақтығыс жағдайында қызметкерлердің бір күні үш күнге есептеледі. Яғни қауіпті жағдайда қызмет етуі олардың тәжірибесіне және зейнетақысына толық бағаланады.

Сондай-ақ осындай жағдайда атқарылған қызмет үшін қаржылық ынталандыру қарастырылған: қызметкерлерге лауазымдық айлық, арнайы атаққа қосымша төлем немесе әскери атақ бойынша айлық үш есе төленеді.

Бұл шешім құтқарушылар мен әскери қызметшілердің әлеуметтік қорғалуын арттырып, олардың кәсіби ерлігін бағалауға бағытталған. Табиғи апаттар, техногендік төтенше жағдайлар мен қауіп-қатерлердің алдын алу, адамдардың өмірін сақтап қалу үшін алдыңғы шепте тұрған қызметкерлердің еңбегі енді ресми түрде ерекшеленіп есептеледі.

Құтқарушы мамандығы – әрдайым қауіпті, жауапкершілігі ауыр қызмет. Олар табиғи апаттарда, өрт пен техногендік апаттарда бірінші болып барады, адамдардың өмірін сақтап қалу үшін тәуекелге барады. Бұл мамандыққа тек кәсіби шеберлік қана емес, батылдық, төзімділік және адамға деген шынайы жанашырлық қажет. Осындай қаһармандықты мемлекет енді заң жүзінде де бағалап, қорғайды.

Құралай ӘЛЖАППАР,

«QH»