Жарты ғасырдан астам ел қорғаны – сарбаздар саулығы үшін
Қарағанды қаласындағы әскери лазарет биыл өзінің 55 жылдық мерейтойын атап өтуде. Бұл – Қазақстан Қарулы Күштерінің тарихындағы ең көне әрі тәжірибесі мол әскери-медициналық мекемелердің бірі. 1970 жылдан бері сарбаздар мен офицерлердің денсаулығын сақтауда маңызды рөл атқарып келе жатқан ұжым бүгінде өз кәсібіне адал, жоғары білікті мамандармен мақтана алады.
Әскери лазареттің негізі 1970 жылы 26 тамызда қаланды. Бұл күні алғаш рет әскери бөлім командирінің бұйрығы шығып, Дубовка елдімекенінде 75 төсек-орындық гарнизондық госпиталь ретінде жұмысын бастаған. Ол кезде Алматыдан Қарағандыға 203-ші Запорожье-Хинган Қызыл Ту орденді мотоатқыштар дивизиясы көшіп келген болатын.
– Алғашқы жылдары емдеу ісі барак типтес бес ғимаратта жүргізілді. Соған қарамастан, мамандардың біліктілігі мен жауапкершілігінің арқасында госпиталь бірден маңызды медициналық орталыққа айналды, – деп еске алады, әскери лазарет басшысының орынбасары Гүлжахан Қойкенова.
Уақыт өте келе мекеменің қызмет аясы кеңейіп, 1989 жылы ол Қарағанды қаласындағы әскери қалашыққа көшірілді. Ал 2006 жылдан бастап лазарет Ермеков көшесі, 65-үйде орналасқан қазіргі төрт қабатты ғимаратта қызметін жалғастырып келеді.
– Қарулы Күштерді реформалау аясында біздің мекеме гарнизондық госпиталь мәртебесінен әскери лазаретке ауыстырылды. Қазіргі таңда құрамымызда екі негізгі бөлімше – хирургиялық және терапиялық емдеу бөлімдері жұмыс істейді. Жеткілікті материалдық база мен білікті кадрларымыз бар, – дейді Гүлжахан Қойкенова.
Бүгінде лазарет Қарағанды ғана емес, сонымен қатар Павлодар, Қостанай, Ақмола, және Солтүстік Қазақстан облыстарындағы әскери бөлімшелерге қызмет көрсетеді. Мекеме мамандары шұғыл, жоспарлы және профилактикалық медициналық көмек көрсетуді жоғары деңгейде қамтамасыз етеді.
– Жыл сайын жүздеген әскери қызметші бізге жүгінеді. Біз үшін әрбір сарбаздың денсаулығы – басты құндылық. Медициналық қызметтің сапасын арттыру, технологияны жаңарту және жас мамандарды тәрбиелеу – басты мақсаттарымыздың бірі, – деп атап өтті лазарет басшысының орынбасары.
Бүгінде Қарағандыдағы әскери лазарет – тек медициналық мекеме ғана емес, әскери медицинаның тәжірибе мен тарихқа толы мектебі. Жарты ғасырдан астам уақыт ішінде бұл ұжым жүздеген білікті дәрігер мен медицина маманын тәрбиелеп шығарды.
– Біз өткенімізді мақтан тұтамыз, ал болашаққа сеніммен қараймыз. Ел қорғаны – жауынгерлердің саулығы үшін аянбай еңбек ету – біздің азаматтық әрі кәсіби борышымыз, – дейді Гүлжахан Бірлікқызы.
Жұпар АМАНБАЙҚЫЗЫ,
«QH»