Қарағандыда резонанс тудырған жол апаты ісіне нүкте қойылды
Қарағандыда бір адамның қазасына, бірнеше адамның жарақат алуына себеп болған жол апаты бойынша сот үкімі шықты. Белгілі кәсіпкер Сергей Камаев кінәлі деп танылып, 2 жыл 6 айға бас бостандығынан айырылды. Сонымен қатар ол 5 жыл көлік басқару құқығынан шеттетілді. Алайда жәбірленуші тарап үкімді тым жеңіл деп бағалап, жоғарғы сатыдағы сотқа шағым түсірмек.
Жол апаты қалай болды?
Қайғылы оқиға 2024 жылдың 2 қыркүйегінде, сағат 14:15 шамасында Аманжолов көшесінде тіркелді. 56 жастағы Сергей Камаев Lexus LX 570 көлігімен сағатына 150 шақырым жылдамдықпен қозғалып, рөлге ие бола алмай қарсы бағыттағы бірнеше көлікке соқтығысқан. Соның салдарынан облыстық ауыл шаруашылығы басқармасының қызметкері Ерлан Алдаңғаров оқиға орнында қаза тапты.
Сот үкімі
Қазыбек би аудандық сотының судьясы Жаңылсын Шамұратова Камаевты ҚР Қылмыстық кодексінің 345-бабы 3-бөлігі бойынша кінәлі деп танып, үкім жариялады:
«Камаев Сергей Васильевич екі жыл алты ай мерзімге бас бостандығынан, сондай-ақ бес жыл мерзімге көлік құралдарын басқару құқығынан айырылсын. Жаза мерзімі 2024 жылғы 2 қыркүйектен бастап есептеледі», – деді судья.
Дегенмен айыпталушының қамауда өткізген әр күні екі күнге есептелетіндіктен, жазаның негізгі бөлігі өтеліп қойған. Енді ол қалған алты айын қылмыстық-атқару жүйесінің минималды қауіпсіздік мекемесінде өтейді.
Жәбірленушілер жағы үкімге наразы
Жәбірленушілердің адвокаты Мейрамғали Мурзалипов сот шешімімен келіспейтінін ашық айтты:
«Заң бойынша ең жоғары жаза – бес жыл бас бостандығынан айыру. Бірақ сот бар болғаны екі жыл алты ай кесті. Бұған сотқа дейінгі тергеудің сапасыз жүргізілуі себеп. Камаев соққан көліктердің жүргізушілері жәбірленуші емес, куәгер ретінде ғана танылды. Бұл – заңның өрескел бұзылуы. Біз бұл үкімге қарсы шығып, облыстық сотқа шағымданамыз», – деді ол.
Өтемақы төлеу міндеттелді
Сот шешімімен Камаев қаза тапқан Ерлан Алдаңғаровтың отбасына материалдық және моральдық өтемақы төлеуге міндеттелді. Марқұмның жары Дана Алдаңғароваға 1,6 млн теңге материалдық шығын, 900 мың теңге адвокат қызметіне кеткен қаражат және 10 млн теңге моральдық өтемақы өндірілді.
Қоғамдық түйін
Бір адамның қателігі бір әулетті қайғыға батырды. Жол апаты ісінің сотта қаралуы аяқталғанымен, туыстары жоғалтқан жанды ештеңе қайтара алмайды. Ал сарапшылардың айтуынша, жүргізушілердің жылдамдықты шектен тыс асыруы мен тәртіпсіздігі түзелмейінше, мұндай қайғылы жағдайлардың алдын алу қиын.
Құралай ӘЛЖАППАР,
«QH»