Жаңа жоба — жаңа жетістік
Қарағанды облысында футболды дамытуға 18,5 млрд теңге көлемінде ірі инвестиция тартылмақ. Бұл қаржы өңірде тек кәсіби спортты ғана емес, бұқаралық футболды да жаңа деңгейге көтеруді көздейді.
Жоспарға сәйкес, ең алдымен 12 млрд теңге арнайы футбол академиясын салуға бағытталады. Академия құрамында 3 500 жанкүйерге арналған заманауи стадион, жыл он екі ай жұмыс істейтін жабық манеж, жылыту жүйесі бар жаттығу алаңдары, спортшыларға арналған жатақхана, медициналық кабинеттер мен қосымша инфрақұрылым қарастырылған. Бұл нысан болашақта балалар мен жасөспірімдердің кәсіби спортқа қадам басуына үлкен мүмкіндік бермек.
Ал қалған 6,5 млрд теңге қаражат бұқаралық футболды дамытуға жұмсалады. Бұл бағытта қала мен ауылдық жерлерде шағын футбол алаңдары салынып, мектептер мен балабақшаларда жаңа спорттық бағдарламалар іске қосылады. Сондай-ақ жастар мен әйелдер футболына қолдау көрсету, түрлі турнирлер мен фестивальдер ұйымдастыру жоспарланған.
Бағдарламаның ауқымы да кең. 2029 жылға дейін ол 40 мыңнан астам мектеп оқушысын және 3 600-ден астам студентті қамтуы тиіс. Жоба өңірдегі 100-ден астам білім беру мекемесін қамтып, спортты білім беру жүйесінің ажырамас бөлігіне айналдыруды көздейді. Бұған қоса, кадр дайындау ісіне ерекше назар аударылады: жаттықтырушылардың біліктілігін арттыру курстары, халықаралық тәжірибе алмасу бағдарламалары және UEFA лицензиясын алу мүмкіндіктері қарастырылған.
Бұл бастамалар облыстық футбол қауымдастығының конференциясында жария етілді. Жиын барысында қауымдастық басшылығы да ауысты. Бұған дейін қауымдастық президенті қызметін атқарып келген облыс әкімі Ермағанбет Бөлекпаев өкілеттігін тоқтатып, оның орнына Freedom Holding Corp. бас атқарушы директоры, Freedom QJ League қамқоршылық кеңесінің төрағасы Тимур Турловтың кандидатурасын ұсынды. Конференцияға қатысушылар бұл шешімді бірауыздан қолдады.
– Футбол жай ғана спорт емес, ол жастарды тәртіпке, көшбасшылыққа, командалық рухқа тәрбиелейтін құрал. Мемлекет те, Президентіміз де бұқаралық спортты дамытуға ерекше назар аударып отыр. Тимур Русланұлы ұсынған жоба аймақтың спорттық болашағы үшін стратегиялық қадам деп есептеймін. Әсіресе балалар мен жасөспірімдер спортына арналған бастамаларға қолдау көрсетуге дайын екенімді атап өткім келеді, – деді облыс әкімі Ермағанбет Бөлекпаев.
Өз кезегінде жаңа президент Тимур Турлов төрт жылға арналған стратегиялық бағдарлама ұсынды. Оның басты қағидаттары – жүйелі даму, ашық басқару, балалар мен жастар футболына басымдық беру.
– Футболдың іргетасы үлкен ареналардан емес, аулалардан, мектеп алаңдарынан басталады. Біз дәл осы бағытты күшейтуге басымдық береміз. Freedom Holding Corp. компаниясы өңірдегі футбол инфрақұрылымына 18,5 млрд теңгеден астам қаржы салуды жоспарлап отыр. Қарағанды – футбол дәстүрі мықты өңір. Мұнда футбол тек ойын ғана емес, мәдени кодтың бір бөлігіне айналған. Біз осы дәстүрді сақтап қана қоймай, жаңа деңгейге көтеріп, болашақ ұрпаққа мақтаныш боларлық жүйе қалыптастырамыз деп сенемін, – деді Тимур Турлов.
Соңғы үш жылда облыста 161 футбол алаңы мен үш жабық манеж салынғаны белгілі. Сондай-ақ «Шахтёр» стадионында қайта жаңғырту жұмыстары жүргізілуде.
Ералы ҒАНИ,
«QH»