Қауіпсіздік басты назарда!
Тәуелсіз еліміздің ертеңгі сеніп отырған болашағы – біздің балаларымыз! Көлік объектілерінде қауіпсіздік пен қоғамдық тәртіпті сақтап жүрген көліктегі полиция қызметкерлерінің де ең басты міндеттерінің бірі – балалардың қауіпсіздігі.
Оқу жылының қарсаңында Қазақстан Республикасы ішкі істер министрліктің нұсқауымен теміржол және әуе көлігі объектілерінде тиісті қоғамдық тәртіпті сақтау, қылмыстардың алдын алу, теміржол нысанында адам басу фактілерін жолын кесу мақсатында Қарағанды-Сұрыптау станциясындағы желілік полиция бөлімінің қызмет ету аумағында 25 тамыз бен 10 қыркүйек аралығында «Абайлаңыз – балалар!» республикалық акциясы өткізілуде.
Тәртіп сақшыларының жүргізіліп жатқан алдын алу шарасына қарамастан, соңғы кезде осы балалардың қатысуымен болатын оқыс жағдайлардың көбейіп кетуі де қазіргі таңда көлік сақшыларын қатты алаңдатуда.
Қарағанды-Сұрыптау станциясындағы желілік полиция бөлімінде биылғы жылдың жаз айларында балалардың қатысуымен болған екі оқыс оқиға тіркелді.
Құрметті ата-ана!
Теміржол – ойнайтын алаң емес! Теміржолда келе жатқан пойыздың орташа жылдамдығы сағатына 60 шақырымнан 120 шақырымды құраса, оның орташа жылдамдықпен келе жатқан тежеу жолы 200-ден 500 метрге дейін арақашықтықты алатынын естен шығармаңыздар!
Теміржол – қаупі жоғары аймақ! Теміржолдан өту барысында қарапайым қауіпсіздік ережелерін сақтамау мен алаңғасарлық таныту жоғарыдағы қайғылы оқиғаларға әкелуі әбден мүмкін.
Қарағанды Сұрыптау станциясы
ЖПБ ақпараттық саясат тобы