Ұлағатты ұстазға арналған құрмет белгісі

Евней Бөкетов атындағы Қарағанды ұлттық зерттеу университетінде еліміздің ғылым саласына зор үлес қосқан физика ғылымдарының докторы, профессор Темірғали Көкетайдың құрметіне ескерткіш тақта орнатылды. Құрметті ұстаз еңбек еткен оқу ғимараты енді оның есімімен байланысты маңызды тарихи нысандардың біріне айналды.

Ғұлама ғалымның есімін құрметтеуге арналған шараға отбасынан бастап, әріптестері, шәкірттері және жергілікті билік өкілдері қатысты. Қатысушылар ұстаздың рухына тағзым етіп, жүрекжарды естеліктерімен бөлісті.

– Қатысып отырған барлық халыққа шын жүректен алғысымды білдіремін. Ағамызды жас кетті деп өкінішпен еске аламыз, бірақ ол өмір бойы «Қазақты қазақ қыламын» деп еңбек етті. Оның атағы өте зор болды. Өз сөзімен айтқанда, «Мен барлық атағымды жинап алып, осы қазақты қазақ қылып шықсам, бұл маған жетерлік» деген еді. Қазір оның арманы жүзеге асып келе жатыр. Осыған орай, мен халқыма үлкен алғысымды айтқым келеді, – деді Темірғали Көкетайдың қарындасы Бәтима Көкетаева.

Академик Темірғали Әбілдаұлы – қазақ ғылымының жарқын тұлғасы, «Оксфорд» университетінде дәріс берген тұңғыш отандық маман. Ол Қазақстандағы қатты дене физикасы ғылыми мектебінің негізін қалаушы ретінде танылды. 1999 жылы халықаралық биографиялық орталықтың шешімі бойынша әлемдік физиктер арасынан «ХХ ғасырдың ғұлама адамы» атағын алған.

– Мен үшін Темірғали Көкетай – тек физик қана емес, әдебиет пен тарихты терең сүйген әмбебап ғалым болды. Жатқан жері жайлы болсын. Университет Темірғали Көкетайдың құрметіне естелік тақта орнатып жатыр, бұл оның еңбегінің лайықты бағасы деп ойлаймын. Мұндай шара университеттің ұлттық мәртебеге ие болуымен де үйлесім табады. Бұл бәрі де ол кісінің қандай ерекше адам болғанын айқын көрсетеді, – дейді «Тұлғатану» ғылыми-зерттеу орталығының директоры Нұрсахан Ахметова.

Мемориалдық тақта – ғалымға арналған құрмет белгісі ғана емес, сонымен бірге жас ғалымдар мен студенттерге үлгі, ынталандыру.

Қанағат ЖИЕНҚҰЛОВА,

«QH»