Мемлекет басшысы ұстаздарды марапаттады

Дәстүрлі тамыз конференциясында Мемлекет басшысы білім беру саласында ерекше еңбегімен танылған педагогтарды мемлекеттік наградалармен марапаттады.

Президент қазақстандық ұстаздардың қажырлы еңбегін жоғары бағалап: «Мен Қазақстан ұстаздарының қажырлы еңбегін жоғары бағалаймын, сіздер жас буынға беріп жатқан білімнің күшіне сенемін. Шын мәнінде, ұстаздық – жай мамандық емес, бұл – ұлы миссия. Адам қандай жетістікке жетіп, биікке шықса да, ұстазының алдында өмір бойы шәкірт болып қалады. Қазақстанның жарқын болашағы Сіздердің табанды еңбектеріңізге тікелей байланысты. Себебі, сіздер тұтас ұлтты оқытып, тәрбиелеп жатсыздар. Осы жауапкершілікті терең сезініп, қастерлі міндетті абыроймен атқара бересіздер деп сенемін. Сіздердің еңбектеріңіз ең жоғары құрметке лайық. Мен бүгінгі тамыз конференциясына орай бір топ ұстазды мемлекеттік наградалармен марапаттау туралы Жарлыққа қол қойдым. Бес мұғалімге «Қазақстанның еңбек сіңірген ұстазы» құрметті атағы беріледі», – деді.

Мемлекет басшысының Жарлығымен биыл бірнеше мәртебелі атақтар мен орден-дәрежелер берілді.

Марапатталғандар қатарында Қарағанды облысының тәжірибелі география пәнінің мұғалімі, біздің жерлестеріміздің мақтанышы – Даурықбаева Шұға Амангелдіқызы да бар. Ол ұзақ жылдар бойы кәсіби шеберлігімен ерекшеленіп, шәкірттерін жоғары сапалы білімге тәрбиелеп келеді. Шұға Амангелдіқызының білім беру саласындағы ұлтжанды еңбегі мемлекет тарапынан лайықты бағаланып, арнайы «Құрмет» орденімен марапатталды.

Бұл құрмет – тек жеке педагогқа ғана емес, Қарағанды педагогикалық қауымдастығына деген ұлттық деңгейдегі алғыстың айқын көрінісі. Шұға Амангелдіқызына үлкен алғыс білдіре отырып, оның кәсіби шабытын арта түсіруіне тілектеспіз!

Құралай КӨБЕНОВА,

«QH»