Жаңа оқу жылында мектептерге ЖИ енгізіледі

Биылғы оқу жылы білім беру үдерісінде жасанды интеллект (ЖИ) элементтері кезең-кезеңімен енгізіледі. Бұл туралы Үкімет отырысында Оқу-ағарту министрі Ғани Бейсембаев хабарлады.

Қазіргі таңда елімізде 8 мыңнан астам мектеп жұмыс істейді. 1 қыркүйекте 4,1 миллион оқушы мектепке оралады, оның ішінде 341 мың бала бірінші сыныпқа барады, ал 232 мың оқушы 11-сыныпты аяқтайды.

Министрдің айтуынша, 2025-2026 оқу жылында ЖИ интеграциясы «Цифрлық сауаттылық» және «Информатика» пәндерінен басталады. Оқу процесінде жасанды интеллекті қолданудың этикалық стандарттары бекітілген. Оқушылар үшін арнайы Day of AI онлайн курстары, ал мұғалімдерге үш деңгейлі біліктілікті арттыру бағдарламасы дайындалған.

«Мемлекет басшысының тапсырмасымен басқарудың жаңа стандарты әзірленді, 3 мыңнан астам педагог үш деңгейлі оқытудан өтті. Бұл модель өз жұмысын осы жылдың қыркүйегінен бастайды», – деді Ғани Бейсембаев.

Сонымен қатар министр «Келешек мектептері» жобасы аясында жаңа форматтағы мектептерді басқару мәселесін де қозғады.

Құралай КӨБЕНОВА,

«QH»