Жас математиктің жарқын жеңісі
Жапония астанасы Токиода Азияның түкпір-түкпірінен келген үздік оқушылардың басын қосқан беделді білім сайысы өтті. Қатал іріктеу кезеңдерінен өткен қатысушылар мұнда білімін ғана емес, төзімділігін де сынады. Осы додада Қарағанды қаласының атынан қатысқан Аида Ерланова қола медаль жеңіп алды.
– Әр жарыс үлкен стресс. Дегенмен бар күшімді салдым. Жарысқа дайындықты ағылшын және өзге де сабақтарыммен ұштастырғандықтан толық дайын болдым деп айта алмаймын. Бірақ күн сайын 1-2 сағат уақытымды есеп шығаруға арнадым. Соның нәтижесінде қола медаль иелендім, – деді AIMO – 2025 олимпиадасының жүлдегері Аида Ерланова.
AIMO – Азия елдері арасында математикаға қабілетті дарынды балаларды анықтауға бағытталған беделді олимпиада. Биылғы бәсеке 31 шілде мен 7 тамыз аралығында өтіп, қатысушылар бірнеше кезеңнен тұратын күрделі есептерді қысқа уақыт ішінде шешуге тырысты. Аида сол сынақтардан сүрінбей өтіп, жүлдегер атанды.
– Болашақта қаржы саласында еңбек еткім келеді. Бұл олимпиада мен үшін үлкен мотивация болды. Яғни мүмкіндіктерге қарай ұмтылып, өмірді басқа қырынан көруге жол ашты. Токиодан жүлдемен оралу – мен үшін мәртебе. Бұл жеңіс тек өзімнің ғана емес, ұстаздарым мен ата-анамның еңбегінің жемісі, – дейді жас математик.
Аиданың айтуынша, дайындық айлап жүргізілген. Ол жеңісіне ұстаздарының бағыт-бағдары мен ата-анасының қолдауы ерекше ықпал еткенін атап өтті. Жас дарын енді халықаралық деңгейде алтын медаль алуды мақсат етеді.
– Математика – жеке бір әлем. Себебі кез келген математикаға бейім оқушы олимпиададан жеңіске жете бермейді. Аида өзінің жан-жақтылығының, табандылығы мен еңбектенуінің арқасында осындай жетістікке жетіп отыр, – деді Қарағанды Назарбаев зияткерлік мектебі директорының орынбасары Әлібек Әсетов.
Бұл жеңіс – жас математиктің табандылығы мен еңбегінің айғағы. Оның жетістігі қатарластарын да жаңа белестерді бағындыруға жігерлендіреді.
Ералы ҒАНИ,
«QH»