Жас өнерпаз

Қарағандылық жас дарын Томирис Дүйсенбай Халықаралық балалар шығармашылығы фестивалі – Mitsubishi Asian Children’s Enikki Festa байқауында Гран-при иегері атанды. Бұл өнер додасына әлемнің 24 елінен балалар қатысқан. Ал жеңімпаздарды марапаттау рәсімі Жапонияның Осака қаласында өтті.

Томирис сурет салуды небәрі бір жыл бұрын ғана бастапты. Бұған дейін балетке қатысып, үлкен тенниспен шұғылданған. Бірақ өткен жылы қыз бала сурет пен фортепианоға қызығып, «Shabyt» орталығына жазылған. Оның мұғалімі талантын бірден байқап, қолдау көрсеткен. Сурет салумен қатар Томирис ағылшын тілін үйреніп жүр, сонымен бірге фортепианода ойнайды.

Фестивальге қатысу жайлы отбасысына «Shabyt» орталығының тәлімгері Назира Нұрланқызы айтқан екен. Ол Томириске конкурсқа жұмыс дайындауға бағыт-бағдар берген.

Жас суретші өткен оқу жылында байқауға арнап суретін салып қойған. Онда өзі бұрын айналысқан балет пен теннисті бейнелеп, қосымша жазбасында бұл хоббилердің оған сыйлаған әсерін сипаттап берген.

– Жауапты ұзақ күттік. Биыл мамыр айының соңында ЮНЕСКО хабарласып, Томирис Қазақстан атынан Гран-при жеңіп шыққанын және Жапониядағы марапаттау рәсіміне шақырылғанын жеткізді. ТМД елдерінен жалғыз өзі қатысты, – дейді анасы Камила Әкенова.

Томирис марапатқа әкесімен бірге барып қайтты. Осакадағы ресми шарадан соң қатысушыларға арнайы мәдени бағдарлама ұйымдастырылып, Киото қаласына экскурсия жасалды. Сонымен қатар жеңімпаздар жергілікті мектеп оқушыларымен кездесіп, шығармашылық жұмыстар атқарды.

– Томирис үшін бұл үлкен тәжірибе болды. Әрине, жол ұзақ болды. Алматы арқылы Кореяға, одан Жапонияға жеттік. Бірақ барлығы соған тұрарлық. Ол жаңа достар тауып, шабыт алып келді. Енді суретке деген махаббаты бұрынғыдан да арта түсті, – дейді анасы.

Ералы ҒАНИ,

«QH»