Ата-аналар алаңдаулы
Қарағанды қаласының ойын алаңдарында тоқ соғу оқиғалары жиілеп, ата-аналардың алаңдаушылығын арттырып отыр. Балаларға арналған демалыс орындарында жарық бағаналарының сымдары ашық-шашық күйінде қалып, қауіпсіздік талаптарының сақталмауы салдарынан бірнеше тұрғын зардап шеккен.
Ойын баласының қуанышы қайғыға ұласа жаздаған оқиғаның бірі 15-шағынауданда тіркелді. Мұнда байқамай бағанадағы ашық сымға қолын тигізіп қойған бүлдіршін қатты шошынып қалғанымен, аман қалды.
«Бала сырғанақтан сырғанап түсіп, әлгі бағанаға қарай жүгіріп кетті. Жалпы, олар үнемі сол жерде ойнайтын. Біз де сымдардың ашық жатқанын көрмедік. Қарасақ, қолын ұстап, жылап тұр. Ол кезде көшедегі жарық жанып тұрған, кейін бірден сөніп қалды», – дейді Ксения Алексеева, 15-шағынауданның тұрғыны.
Жергілікті тұрғындардың айтуынша, қауіпті сымдар кейін сол күні ғана алынып тасталған. Алайда мұндай жағдай мұнымен шектелмей отыр. Ұқсас оқиға 12-шағынаудандағы 41-үй маңында тіркелген.
«Бағананың төменгі бөлігінде сымдар ашық жатыр. Балалар күнде осы жерде ойнайды. Соның кесірінен жуырда бір баланы тоқ соғып, ауруханаға жеткізді», – дейді тұрғындар.
Қауіп туралы хабарламалар сенім телефондарына берілгенімен, шаралар уақытылы қолға алынбағанын зардап шеккендер алға тартады. Ал Әлихан Бөкейхан ауданы әкімдігіндегілер бұл ақпарат түсе салысымен әрекет еткендерін айтады.
«Тоқ соғу оқиғасының себебі – жарық шамдары бағаналарында қорғаныш қақпақтардың болмауы. Бұл жағдайлар ұдайы орын алатын ұрлық фактілеріне байланысты. Қақпақтары жоқ бағаналар анықталып, мердігер ұйымдарға жіберілуде», – дейді аудандық ТКШ және тіршілікпен қамтамасыз ету бөлімінің басшысы Азат Ақынов.
Әкімдік өкілдері мұндай жағдайларға куә болған тұрғындарға 35-06-42 диспетчерлік нөміріне немесе Instagram мен Telegram желілеріндегі ресми парақшаларға хабарласуға кеңес береді.
Қақпақтарды кім және не үшін алғаны әзірге белгісіз. Электр қуатын заңсыз пайдалану мақсатында ұрлық жасалды ма – ол жағы да түсініксіз күйінде қалып отыр. Дегенмен, қала тұрғындары жылдар бойы бағаналардың негізін вандалдарға қолжетімсіз ету мәселесін көтеріп келеді. Қарағандыда мұндай қорғалған шам бағаналарының үлгілері жоқ емес. Мәселен Магнитогорск көшесі мен Орталық саябақ аумағында олар қойылған.
Балалардың өміріне қауіп төндіріп отырған ашық тоқ сымдары – жүйелі мәселе. Тұрғындар тиісті органдар қауіпсіздік шараларын күшейтіп, ойын алаңдарын толық тексеруден өткізуі керек дейді. Әйтпесе, бүгінгі алаңдағы алаңдаушылық ертең орны толмас қайғыға айналуы мүмкін.
Құралай ӘЛЖАППАР,
«QH»