Қарағандылық дәрігерлер ерте диагностикаға үндейді
Қарағанды онкологтары жөтел, ентігу, салмақтың төмендей бастауы секілді белгілерге селқос қарамауға шақырады. Себебі бұл – өкпенің қатерлі ісігіне тән алғашқы симптомдар. Дәрігерлер дертті бастапқы кезеңінде анықтау үшін флюорографиядан жыл сайын өтіп тұрудың маңызы зор екенін айтады. Статистикаға сүйенсек, жыл сайын әлемде өкпе қатерлі ісігінің 1 миллионға жуық жаңа жағдайы тіркеледі. Алайда науқастардың басым бөлігі дәрігерге тым кеш жүгінеді.
Өкпе обыры – онкологиялық аурулар арасындағы өлім-жітім бойынша бірінші орында тұрған дерт. Оның жасырын ағымы, ерте кезеңде айқын белгілердің болмауы – диагноз қою мен емдеуді қиындатады.
«Өкпе обырына ер адамдар жиі шалдығады және өкінішке қарай, бұл диагноз бойынша бірінші орында тұр. Ең өкініштісі – бізге келетін науқастардың көпшілігі аурудың 3-4 кезеңінде түседі. Ал мұндай жағдайда емнің нәтижесі көбіне көңіл көншітпейді», дейді Қарағанды қаласындағы №3 көпсалалы аурухананың бас және мойын ісіктері мен торакалдық хирургия бөлімінің меңгерушісі Ерғали Шәуенов.
Өкпе қатерлі ісігі көбіне темекі түтінінің, зиянды химиялық заттардың және ұзаққа созылған қабынудың әсерінен дамиды. Бастапқы кезеңінде ауру белгі бермегенімен, уақыт өте келе жасушалар қауіпті ісікке айналады. Сондықтан жыл сайын флюорографиядан өту – өкпедегі өзгерістерді ерте анықтаудың ең тиімді жолы.
«Темекі шегетін адамдардың 20%-дан астамы өкпе обырына немесе ауыз қуысының қатерлі ісігіне шалдығу қаупіне ие. Бұл клиникалық зерттеулермен дәлелденген. Темекіге тәуелді науқастардағы ісік шылым шекпейтіндерге қарағанда өзгеше дамиды. Сондықтан бұл топтағы науқастарды емдеу күрделірек. Белгілеріне — ентігу, жөтел, қақырықпен бірге қан араласуы, әлсіздік пен салмақтың азаюы жатады. Мұндай симптомдардың бірі байқалса, тұрғындар дереу дәрігерге қаралуы тиіс. Ауруды ерте анықтау – өмірді сақтап қалудың басты жолы», дейді Ерғали Шәуенов.
Қарағандылық онкологтар бүгінгі күні бұл дертті емдеудің барлық заманауи әдісті меңгерген. Көбіне шағын инвазивті тәсілдер – арнайы инемен жасалатын пункциялық ота әдістері қолданылады. Мұндай процедурадан кейін науқас келесі күні-ақ қозғала алады. Дәрігерлер ең бастысы – уақыт жоғалтпай, дер кезінде тексеріліп тұру қажет екенін айтады.
Мамандар кеңесі:
— флюорографиялық тексеруден жылына кем дегенде бір рет өтіңіз;
— темекіден бас тартып, өкпеге зақым келтіретін факторлардан аулақ болыңыз;
— жөтел, ентігу, қан аралас қақырық, салмақ жоғалту байқалса, дереу маманға қаралыңыз.
Өзіңіздің денсаулығыңызды қорғау – өмірді қорғау екенін естен шығармаңыз.
Құралай КӨБЕНОВА,
«QH»