Таулы жолдағы қос батыр
Қарқаралыда өткен республикалық Qarqaraly Buguly Trail атты трейл-марафон жоғары деңгейде ұйымдастырылып, спорт сүйер қауымды тәнті еткен болатын. Үш күнге созылған бұл ауқымды жарысқа еліміздің түкпір-түкпірінен келген 600-ден астам қатысушы қатысты. Жарыс аясында Ресей мен Испаниядан келген жеті шетелдік спортшы да таулы трассада өз мүмкіндігін сынады.
Алайда көпшіліктің назарын ерекше аударған – бір жастағы ұлы Әлижанмен бірге 12 шақырымдық таулы жолды жүріп өткен Меруерт Халелова болды. Арнайы туристік рюкзакқа отырған баламен бірге тауды бағындыру ерлікке пара-пар іс.
Меруерт Халелова бұрын кеңседе қаржы саласында еңбек еткен. 30 жасқа дейін тұрақты жұмыспен айналысып жүріп, бір сәтте спортқа бет бұрған. Қазір Астанада сертификатталған фитнес және жүзу жаттықтырушысы болып жұмыс істейді. Ана атанғаннан кейін де спортты тастамаған ол өз өмірінің басты құндылығы қозғалыс пен белсенділік екенін айтады.
– Ұйымдастырушылар барлық жайды ескерген. Жол бойында біздің артымыздан көлікпен бақылаушылар жүріп отырды. Олар бірнеше рет жағдайымды сұрап, қолдау білдірді. Ал көрермендер жылы сөздерін жаудырып, ерекше атмосфера сыйлады, – дейді Меруерт Халелова.
Сөмкедегі баланың салмағы жабдықтармен қоса 16 келі болған. Соған қарамастан, Меруерт жарысты сәтті аяқтап, мәреге бірінші болып келмесе де, халықтың ерекше құрметіне ие болды.
– Ұлым қырқынан шыққалы бері екеуміз серуендеуді жақсы көріп кеттік. Көп қозғаламыз, қонаққа жиі барамыз. Балам серуенге бейім. Бұл жарыста аса тәуекелге бармай, көбіне жаяу жүріп өттім, – дейді ол.
Меруерттің бұл жетістігі – жалғыз марафонмен шектелмейді. Бұған дейін ол Алматы марафонында (42 км) жүгіріп өткен, сондай-ақ жүзуден халықаралық жарыстарға қатысқан тәжірибелі спортшы.
– Финишке жақындағанда бүкіл халық бізді видеоға түсіріп, қол шапалақтап қарсы алды. Жүргізуші: «Әлижан мен Меруерт келе жатыр!» – деп дауыстағанда, жүрегім елжіреп, көзіме жас келді. Халықтың қолдауы – нағыз марапат, – дейді Меруерт толқыныспен.
Оның бұл ерекше жетістігі енді Guinness World Records, ITRA және Қазақстандағы бірқатар спорт ұйымына ұсынылуы мүмкін. Егер баланың жасы ресми түрде расталса, бұл сәт әлемдік рекорд ретінде тіркеліп, мыңдаған анаға шабыт берер үлгіге айналмақ.
Ералы ҒАНИ,
«QH»