Аула футболы 2025
Аула футболы – жазғы демалысты тиімді өткізудің ең қызықты әрі пайдалы жолдарының бірі. Қарағандыда жыл сайын ұйымдастырылатын «Аула футбол лигасы» бүгінде балалар мен жасөспірімдердің асыға күтетін спорттық жобасына айналды. Бұл жарыс тек футбол додасы ғана емес, салауатты өмір салтын насихаттауға және бұқаралық спортты дамытуға бағытталған маңызды шара.
Қарағандыда «Аула футбол лигасы – 2025» аясында жасөспірімдер арасындағы кезекті кезең өз мәресіне жетіп, 13-15 жас аралығындағы командалар салтанатты түрде марапатталды. Жеңімпаздарға дипломдар, кубоктар, медальдар мен ақшалай сертификаттар табысталды. Сонымен қатар, қазылар алқасы үздік ойыншыларды да анықтап, «Үздік қақпашы», «Үздік шабуылшы» және «Үздік қорғаушы» аталымдары бойынша арнайы сыйлықтар берді.
Салтанатты марапаттау рәсіміне «Шахтер» футбол клубының ойыншылары арнайы келіп, жас футболшылармен естелік суретке түсті.
– Жоба бүгінде дәстүрге айналды. Балалардың дайындық деңгейі өте жоғары. Қазіргі «Шахтер» клубында осы лига арқылы танылып, кәсіби футболға қадам басқан ойыншылар бар. Біз тек алғашқы мүмкіндікті ұсынамыз, әрі қарай бәрі олардың ынтасы мен еңбегіне байланысты. Шахтер ойыншыларын шақырған себебіміз балаларға мотивация беру, – деді Қарағанды қалалық мәдениет, тілдерді дамыту, дене шынықтыру және спорт бөлімінің басшысының міндетін атқарушы Берік Досымбеков.
Айта кетейік, бұған дейін 10-12 жас аралығындағы жасөспірімдер өз ойындарын өткізіп, жеңімпаздар да марапатталған болатын. Турнир Әлихан Бөкейхан және Қазыбек би аудандарындағы футбол алаңдарында ұйымдастырылды.
– Бұл турнирді екі жыл бұрын көріп, бапкерімнен қатысуға рұқсат сұрадым. Кейін тіркеліп, команда жинап жарысқа қатыстық. Топтық кезеңдегі ойындар жеңіл өтті, алайда жартылай финал мен финалда біраз тер төктік. Әсіресе, финалда алғашқы таймнан кейін босаңсып, аздап мінез жетіспей қалды, – дейді жарысқа қатысушы Берік Алмас.
Екінші орынды иеленген Нұрмақов командасының бапкері де өз шәкірттеріне дән риза.
– Біздің команда 2021 жылдан бері тұрақты жаттығып келеді. Биыл бірнеше жетістікке жетіп, республикалық үш турнирде топ жардық. Қырғызстанда өткен халықаралық додаға да қатыстық. Бұл жолғы финал өте жоғары деңгейде өтті. Тұлпар – елімізге танымал команда. Солармен иық тірестіре ойнаған шәкірттерімді мақтан етемін. Қарапайым мектеп командасының осындай дәрежеге жетуі үлкен жетістік, – деп атап өтті Нұрмақов командасының бапкері Ахат Құстай.
Алдағы уақытта лиганың 16-18 жас аралығындағы кезеңі басталады. Ал тамыз айында Қазақстандағы Спорт күніне орай өтетін Суперфиналда әр жас санатындағы үздік командалар өзара кездесіп, «Аула футбол лигасы – 2025» жобасының бас чемпионы анықталмақ.
Ералы ҒАНИ,
«QH»