Қарағандының жаңа көлік дәлізі: Оңтүстік-Шығыс пен Майқұдықты жалғайтын автомагистраль құрылысы басталды

Қарағанды қаласында жол-көлік инфрақұрылымын жаңғырту жұмыстары ауқымды түрде жалғасуда. Мемлекет басшысының тапсырмасына сай еліміздің өңірлерінде көлік қатынасын жақсарту, халыққа қолайлы орта қалыптастыру басты міндеттердің біріне айналды. Осы мақсатта биыл Қарағандыда аса маңызды стратегиялық жоба жүзеге аса бастады. Оңтүстік-Шығыс пен Майқұдық шағынаудандарын тікелей байланыстыратын жаңа автомагистральдің құрылысы басталып кетті.

Аталған жол желісі қаланың негізгі көшелеріндегі көлік тығыздығын азайтып, тұрғындардың жүріп-тұруына қолайлы жағдай жасауы тиіс. Сонымен қатар, жол кептелістерінің алдын алып, транзиттік қозғалысты оңтайландыруға септігін тигізбек.

Жобаның орындалу барысымен Қарағанды облысының әкімі Ермағанбет Бөлекпаев танысты. Аймақ басшысы құрылыс алаңдарын аралап, мердігерлер атқарып жатқан жұмыстардың сапасына баға берді.

Жоспарға сәйкес, жаңа автомагистральдің ұзындығы шамамен 6 шақырымды құрайды. Жол төрт жолақты болады – әр бағытта екі жолақтан. Ол Мұқанов көшесінен басталып, қарқынды дамып келе жатқан Оңтүстік-Шығыс ықшамауданы арқылы өтіп, Майқұдықтағы Шығыс айналма жолына шығарылады.

Биыл бірінші кезең аясында Мұқанов көшесі мен «Династия» тұрғын үй кешеніне дейінгі аралық салынуда. Жобада тротуарлар, көгалдандыру аймақтары мен автотұрақтар қарастырылған. Автомагистральді толық пайдалануға беру 2027 жылға жоспарланған.

Қалада жол құрылысы мұнымен шектелмейді. Бөкетов көшесінде де асфальт төселіп, жаңбыр суын ағызу жүйесі мен жарық тіректері орнатылды. Бұл жобаны биыл аяқтау көзделіп отыр.

Қарағандының негізгі көлік артерияларының бірі – Назарбаев даңғылында да орташа жөндеу жұмыстары жүргізілуде. Бұл жолда соңғы ірі жөндеу 15 жыл бұрын жасалған. Биыл жол жабыны мен тротуарлар жаңартылса, келесі жылы жаяу жүргіншілерге арналған орталық аймақ түбегейлі жаңғыртылмақ. Ескі тастардың орнына сапалы гранит төсеніштер төселуде.

Сонымен қатар Бұқар жырау даңғылы бойындағы жаяу жүргіншілер аумақтарын қайта құру жалғасып жатыр. Қазір «Арбат» сауда үйі алдындағы алаңда 5 мың шаршы метрге жуық ескі тас төсеніш заманауи материалмен алмастырылып, гүлзарлар маңына заманауи орындықтар орнатылуда. Бұл учаскені де биыл толық аяқтау жоспарланған.

Президент тапсырмасына сәйкес елдімекендердің жайлы әрі қауіпсіз болуына баса назар аударылып келеді. Қарағанды қаласында бұл бағытта да жүйелі шаралар қолға алынған. Соның бірі – «Халық қатысатын бюджет» жобасы.

Аталған бағдарлама аясында биыл 104 аула мен гүлзар жаңартылуда. Тұрғындар өздері абаттандыру қажет деп есептейтін аумақтарды таңдап, жергілікті билікпен бірлесе жұмыс істей алады.

Аймақ басшысы Ермағанбет Бөлекпаев Магнитогорск көшесіндегі осындай аулаға арнайы барып, жүзеге асырылып жатқан жұмыстармен танысты. Мұнда футбол алаңы салынып, балаларға арналған ойын алаңының құрылысы аяқталуға жақын. Жоба инклюзивтілік қағидаларын да қамтыған.

– Қаламызда жол құрылысы бұрын-соңды болмаған қарқынмен жүріп жатыр. Жаңа автомагистраль – болашақтың жобасы. Ол тек көлік қозғалысын жеңілдетіп қана қоймай, жаңа мектепке қатынасты да қамтамасыз етеді. Жұмыс қарқынды жүргізілуде, ал бақылау – тұрақты. Сонымен қатар, «Халық қатысатын бюджет» – тұрғындармен кері байланысты нығайтудың жарқын үлгісі. Бұл бағыттағы жұмысты жалғастыра береміз, – деді облыс әкімі Ермағанбет Бөлекпаев.

Құралай ЖҰМАҒАЛИҚЫЗЫ,

«QH»