Жас футболшылардың жарқын жеңісі

Қарағандының жас футболшылары тағы да ел мерейін үстем етті! 2016 жылы туған балалардан құралған «Скаут» командасы Қырғызстанда өткен беделді NITRO ASIAN CUP турнирінде топ жарды. Ыстықкөл жағалауында ұйымдастырылған жарысқа Қазақстан, Қырғызстан және Өзбекстаннан келген 17 команда бақ сынады. Қарағандылық жас «скауттар» барлық алты ойында жеңіске жетіп, алтын жүлдені олжалады.

Жартылай финалда олар Ташкенттің әйгілі «Пахтакор» академиясын жеңіп, финалда алматылық «Қайраттың» үздік командасын 3:0 есебімен сенімді түрде ұтты.

– Қазір «Скаут» клубында 500-ге жуық бала жаттығады, соның 300-і ARTSport бағдарламасы аясында тегін дайындалады.   Тәрбиеленушілеріміздің жетістігіне қатты қуанамыз. Бізге әрдайым сенім білдіріп, қолдау көрсететін ата-аналарға алғыс айтамын! «Скауттың» ең үлкен жеңісі – біздің ұжымдағы достық, сенім және спорттың беретін орасан қуаты. Алда бізді тағы да үлкен жарыстар күтіп тұр, солардан да жеңіспен ораламыз деп сенеміз, – дейді клубтың негізін қалаушы әрі жаттықтырушысы Фёдор Богатырев.

Айта кетейік, жуырда ғана «Скаут» клубының 2015 жылы туған ойыншылары да Қазақстан чемпионы атанған еді. Бүгінде Қарағанды облысында 40 мыңнан астам адам футболмен айналысады, өңірде 100-ден аса команда бар.

Ералы ҒАНИ,

«QH»