Qarqaraly Buguly Trail – ұлттық брендке айналған марафон
2025 жылдың 18-20 шілде аралығында Қарағанды облысының тарихи мекені Қарқаралыда республикалық деңгейдегі ауқымды спорттық шара — Qarqaraly Buguly Trail трейл-марафоны жоғары деңгейде өтті. Шара Ұлы Жеңістің 80 жылдығына және салауатты өмір салтын қолдауға арналған.
Марафон үш күнге жалғасып, еліміздің әр түкпірінен келген 600-ден астам спортсүйер қауымды жинады. Сонымен қатар, Ресей мен Испаниядан келген жеті шетелдік қатысушы да жарыс жолына шықты. Табиғаты көркем Қарқаралы тауларында өткен бұл жарыс – бұқаралық спорт пен ішкі туризмнің үйлесімді үлгісіне айналды.
Qarqaraly Buguly Trail кәсіби спортшылармен қатар, балаларға, ерекше қажеттіліктері бар азаматтар мен олардың ата-аналарына арналған инклюзивті сипатымен дараланды. Жүгіру қашықтықтары қатысушылардың мүмкіндігі мен дайындық деңгейіне қарай таңдалып, 1, 5, 10, 21 және 50 шақырымды қамтыды.
Марафонда ұйымдастырушылық жағынан да жоғары деңгей байқалды — әр бағытта бақылау пункттері, еріктілер, ұлттық парк қызметкерлері мен төтенше жағдайлар мамандары кезекшілік атқарды. Бұл қатысушылардың қауіпсіздігін қамтамасыз етіп, олардың сенімді әрі еркін жарысуына мүмкіндік берді.
Ең ұзақ және ең күрделі 50 шақырымдық қашықтықта Алматыдан келген 36 жастағы әскери қызметкер Руслан Оразов жеңіске жетті. Ол осы жарыстағы ерекше әсерімен бөлісті:
«50 шақырымды артта қалдырдым. Жарыстың алғашқы бөлігінде испан спортшысы алда келе жатты. 40-шы шақырымнан кейін оны басып озуға мүмкіндік туды. Мәре сызығын 4 сағат 30 минутта кесіп өттім. Бұл – менің өмірімдегі екінші трейл-марафоным. Табиғаты керемет, демалыс пен спортты біріктіретін тамаша шара болды», – деді жеңімпаз.
Барлық жеңімпаз бен жүлдегерлерге арнайы медальдар, дипломдар, қаржылай сыйлықтар мен сертификаттар табысталды. Ұйымдастырушылар үшін марафон – бұл тек жарыс емес, ұлт денсаулығы мен ел бірлігін нығайтатын кең ауқымды шара екенін атап өтті.
Марафон аясында тек спорттық емес, мәдени бағдарламалар да өтті. Алғашқы күні қала орталығындағы орталық алаңда жергілікті өнерпаздар мен эстрада жұлдыздары өнер көрсеткен ашық аспан астындағы мерекелік концерт ұйымдастырылды. Кештің басты қонағы – қазақстандық эстраданың танымал әншісі Қайрат Түнтеков болды. Кеш әсерлі отшашумен аяқталды.
Сондай-ақ, қатысушыларға арнап «Мұражайдағы түн» атты ерекше мәдени бағдарлама ұсынылды. Олар тарихи жәдігерлермен танысып, рухани тынығып қайтты.
Qarqaraly Buguly Trail марафоны алғаш рет 2023 жылы ұйымдастырылған болатын. Ол кезде қатысушылар Бұғылы тауына көтеріліп, Шайтанкөл көліне дейін жеткен. Бірінші жарысқа 180 адам қатысып, жеңіс Санкт-Петербургтен келген спортшыға бұйырған еді.
Марафонның негізін қалаушы – спорт энтузиасты, ұйымдастырушы Думан Бейсенай. Ол бұл жобаны табиғи туризм, экология және салауатты өмір салтын ұштастыратын жаңа форматтағы ұлттық спорттық брендке айналдыруды мақсат еткен.
Бүгінде Qarqaraly Buguly Trail – тек спорттық жарыс емес, Қарқаралының табиғи сұлулығын паш ететін, ел бірлігін, халық денсаулығын, мәдени құндылықтарды дәріптейтін ауқымды оқиға. Бұл марафон жыл сайын қатысушылар саны артып келе жатқан халықтық қозғалысқа айналды.
Құралай КӨБЕНОВА,
«QH»